ALCALDÍA
O alcalde presenta a primeira APP do Concello, con todas as propostas culturais, deportivas e de ocio de Fene
05-01-2015
O alcalde de Fene, Gumersindo Galego, presentou a nova APP do Concello para smartphones e tablets. Unha aplicación completamente gratuíta que xa está a disposición de todos os veciños e veciñas. No acto, que tivo lugar o pasado venres, o rexedor estivo acompañado polas concelleiras de Cultura, Rocío Bértoa, e Servizos Sociais, Juana Barro, así como por Sergio Beceiro, responsable de Mundoguía, a empresa da comarca que implantou esta nova ferramenta.Gumersindo Galego destacou que Fene se converte nun dos primeiros municipios da comarca en dar este paso tecnolóxico co que se quere facilitar á veciñanza toda ainformación sobre a actividade cultural, social ou deportiva do municipio. Día a día, e en tempo real. Esta ferramenta é sumamente intuitiva, polo que calquera pode navegar por ela sen dificultade. A edil de Cultura e Deportes, Rocío Bértoa, explicou que aqueles usuarios de Android poden descargala na playstore e, os de Apple, na AppleStore. Nos dous casos, baixo a denominación “Eventos Concello Fene”. E, tamén nos dous casos, a descarga é gratuíta.
Así mesmo, as consultas poden facerse tanto por contidos –cultura, servizos sociais, deportes…- como por datas. E todos os eventos van acompañados do lugar de celebración, coas correspondentes coordenadas; horarios; unha breve descrición e imaxes ou vídeos. Todos eles poden compartirse nas diferentes redes sociais e a ferramenta está dispoñible en galego e castelán. Outro dos apartados destacados pola concelleira foi o de Avisos –nos que se irán colgando todas as incidencias e comunicados de interese veciñal tal que cortes de tráfico ou restricións de estacionamento; interrupcións en servizos ou cambios de horarios por citar algúns-.
Por último, o alcalde confiou en que esta ferramenta sexa de utilidade para a veciñanza, xa que a súa finalidade é precisamente facilitarlle toda a información abrindo cantas canles sexan necesarias e, por último, animou á cidadanía a descargar a aplicación.