O alumnado do Laboratorio de Creación Artística Laudas Calamity expón en Fene as súas creacións

O alumnado do Laboratorio de Creación Artística Laudas Calamity expón en Fene as súas creacións

Inauguran mostra este venres ás 19,30 horas na Casa da Cultura nun acto que contará coa actuación da banda Grey City Funk

Os alumnos e alumnas do Laboratorio de Creación Artística Laudas Calamity que dirixe a artista local Laura Bouza inaugurarán este venres a súa primeira mostra colectiva baixo o título “Libros de Artista “Animalario””. Será na sala de exposicións temporais da Casa da Cultura-Museo do Humor, a partir das 19,30 horas, con entrada libre e de balde e a actuación estelar da banda Grey City Funk.

A partir dese momento, a mostra poderá visitarse ata o 30 de xullo (inclusive) de luns a venres de 10 a 13 horas e de 18 a 21 horas, e os sábados de 10 a 13 h (a partir do día 21, de luns a venres de 10 a 14,15 horas).

Trátase dunha expo colectiva (nenos e adultos) dos alumnos e alumnas do Laboratorio que, neste curso, foron uns 65. Amosarán o traballo realizado en torno aos libros de artista baixo o título "Animalario". Todos teñen o mesmo formato e soporte, sen embargo todos son distintos. O contido dos libros son as imaxes e a palabra (logo levan texto). Segundo Laura Bouza, responsable de Laudas Calamity, queren que esta sexa unha expo didáctica e poder explicar ao público en que consiste crear un libro de artista. Falar da composición, debuxo, distintas técnicas...

Sobre Laura Bouza

Comeza a súa formación na Escola Mestre Mateo (Santiago de Compostela) para logo irse a estudar a Bilbao Belas Artes onde se licencia pola UPV-EHU. Logo continua a súa formación en Pontevedra co Máster en Libro Ilustrado e Animacíón Audiovisual (Universidade de Vigo), entre outros cursos. É a ideóloga e responsable do Laboratorio de Creación Artística, Laudas Calamity, onde na actualidade imparte clases de educación artística e desenvolve a sua actividade como artista.