A mellora da seguridade dos viais do concello de Fene a estudo pola Deputación Provincial
21-02-2020
O alcalde, Juventino Trigo, reuniuse o pasado xoves 20 de febreiro có vicepresidente da Deputación da Coruña, Xosé Regueira
A mellora da seguridade de varios viais do concello de Fene foi un dos temas centrais da xuntanza que mantiveron na Deputación da Coruña o alcalde Juventino Trigo e o vicepresidente Xosé Regueira . Na reunión participaron tamén a deputada María Muíño e a concelleira de Fene, Sandra Permui.
Reducir a sinistralidade da estrada DP 3503 é un dos obxectivos do concello de Fene que o alcalde, Juventino Trigo, trasladou ao vicepresidente da Deputación, Xosé Regueira, na primeira reunión entre as institucións despois da súa toma de posesión. En concreto, o alcalde mostrou a preocupación pola situación do proxecto de obras no vial que atravesa a parroquia de Barallobre, onde estaba previsto a construción de beirarrúas e sendas que conducirían até o cemiterio.
O alcalde Juventino Trigo manifestou o interese en solicitar á Deputación da Coruña a realización do proxecto de mellora da estrada por Barallobre debido a súa alta perigosidade e á proximidade tanto a centros de ensino como ao propio cemiterio. A actuación afectaría tamén á parroquia de Magalofes para o que demanda a construción de novas sendas que faciliten o tránsito das persoas.
Pola súa parte, o vicepresidente da Deputación, Xosé Regueira, comprometeuse a estudar no seo do goberno provincial a situación do proxecto e a súa viabilidade a curto prazo co fin de mellorar a comunicación dun tramo especialmente transitado no concello de Fene.
Ademais, na xuntanza analizaron a situación creada polo novo sistema de implantación do control horario municipal para o que a Deputación da Coruña ofrece unha extensión da súa aplicación informática para a xestión dos concellos.