22-05-2023
Últimos días para participar no XXVII Concurso de Humor Gráfico “Curuxa do Humor”
Os orixinais poderán presentarse até o vindeiro 31 de maio
A poucos días de pechar o prazo de presentación de orixinais, a Concellería de Cultura anima aos/ás debuxantes a participar nunha nova edición dos “Premios Curuxa” do Museo do Humor Xaquín Marín. As persoas interesadas poderán entregar ou remitir os seus debuxos ao Rexistro Xeral do Concello (Praza do alcalde Ramón José Souto González, s/n, 15500 Fene, A Coruña) até o vindeiro 31 de maio. Como principal novidade, nesta edición, os Premios Curuxa inclúen una nova categoría, amais da Curuxa, para maiores de 25 anos, e da Curuxa Nova, para persoas de 16 a 25 anos. Trátase da categoría “Caricatura” na que poderán participar debuxantes a partir dos 16 anos.
19-05-2023
No marco das actividades organizadas ao redor do Día das Letras Galegas e do Día dos Museos, a Concellería de Cultura de Fene anuncia un taller de creación de libro de artista, inspirado na figura de Francisco Fernández del Riego, autor homenaxeado este ano polo 17 de maio. A actividade, titulada “Un libro… unha viaxe. Creación de libro de artista”, terá lugar o sábado 27 de maio ás 11 horas nas instalacións do Museo do Humor Xaquín Marín e vai dirixida a persoas (nenos ou adultos) a partir dos oito anos. A participación no taller é gratuita pero cómpre apuntarse antes do venres 26 de maio ás 14.00 horas enviando un correo a cultura.deportes@fene.gal, indicando o nome completo da persoa e un teléfono de contacto. Prazas limitadas (10).
18-05-2023
Coincidindo coa conmemoración do Día dos Museos, o Museo do Humor Xaquín Marín e Demo Editorial veñen de dar a coñecer os nomes dos/as gañadores/as do I Concurso de BD de Humor “Demo Pequeno”. O xurado desta primeira edición -formado polos debuxantes Santy Gutiérrez e Luís Sendón, xunto co autor de bd e editor de Demo Editorial, Manel Cráneo, e a coordinadora do Museo do Humor Xaquín Marín, Almudena Marcos- reuniuse o pasado 9 de maio e acordou conceder por maioría os seguintes premios:
10-05-2023
A responsable do Museo do Humor Xaquín Marín, Almudena Marcos, o editor de Demo Editorial, Manel Cráneo, e os debuxantes Santy Gutiérrez e Luís Sendón forman o xurado do I Concurso de BD de humor “Demo pequeno” que convocan o Concello de Fene, a través da Concellería de Cultura, e a editorial coruñesa. O xurado reuniuse este martes nas instalacións do Museo do Humor para avaliar os debuxos presentados ao certame que, na súa primeira edición, ascenderon a unha trintena. Tal e como se establece nas bases, o fallo darase a coñecer o vindeiro 18 de maio, coincidindo coa conmemoración do Día dos Museos, a través da páxina web e redes sociais do Museo do Humor Xaquín Marín, Demo Editorial e medios de comunicación.
03-05-2023
Entre os meses de maio e xuño, a Casa da Cultura acollerá a exposición "Meigas, sabias e mulleres boas”, da ceramista fenesa Carme Romero. A mostra recolle unha colección de esculturas cerámicas nas que a figura da muller é o elemento principal “para referir a nosa historia, tradición e cultura”. A exposición inaugúrase este venres, 5 de maio, ás 20.00 horas, e poderá visitarse até o 22 de xuño en horario: de luns a venres, de 10.00 a 13.00 horas e de 16.00 a 21.00 horas; sábados, de 10.00 a 13.00 horas, e domingos e festivos, pechado. No acto deste venres acompañarán á artista fenesa a escritora Emma Pedreira e o TradiCoro de Airiños de Fene.
23-04-2023
A Casa da Cultura de Fene acolle até o vindeiro martes 2 de maio a exposición fotográfica do XVI Premio Luís Ksado que promove a Deputación da Coruña. A mostra recolle os traballos premiados e os finalistas deste certame que no ano 2022 gañou o fotoxornalista Brais Lorenzo cunha serie titulada Lume. Nela cóntase o drama dos incendios forestais, facendo fincapé na traxedia humana que supoñen. Tamén se amosan as obras dos finalistas: Escoria Rebelde, de Fuco Reyes, Europa not welcome, de Sergi Cámara, Máscaras del carnaval gallego. Festival Vibo 2022, de Carlos Ximénez, Paisaje de Inexistencia, de Belén Lozano e Vulcanonautas, de Arturo Rodríguez. A exposición do XVI Premio Luis Kasado poderá visitarse en Fene ate o día 2 de maio no seguinte horario: de luns a venres, de 10.00 a 13.00 horas e de 16.00 a 21.00 horas; sábados, de 10.00 a 13.00 horas, e domingos e festivos, pechado.
18-04-2023
O Museo do Humor Xaquín Marín acolle este venres a presentación dun monográfico adicado ao debuxante fenés
As persoas que asistan ao acto recibirán un exemplar do libro, até fin de existencias
A piques de facer 80 anos, Xaquín Marín é, sen dúbida, o humorista gráfico galego en activo de maior constancia das últimas décadas. “Cronista gráfico non oficial da Galicia popular dos últimos 50 anos”, o artista salienta pola súa “obra, con base no compromiso social e nos valores humanistas, que pode lerse como manual da nosa Historia máis recente, como unha viaxe retrospectiva pola nosa propia memoria colectiva como (im)país”. Así o define o seu fillo, Alexandre Marín -que en 2022 comisariou a exposición retrospectiva Volta á orixe- no monográfico X.Marín. O libro, que se presenta este venres en Fene, foi editado polo Museo do Humor coa colaboración da Consellería de Cultura, a través do programa de axudas destinadas a centros museísticos da Comunidade Autonóma de Galicia 2023. A presentación de X.Marín terá lugar no salón de actos da Casa da Cultura-Museo do Humor Xaquín Marín (Avda. de Conces, 20-22, Fene) este venres, 21 de abril, ás 20 horas, con entrada libre.
07-03-2023
Nova exposición na Casa da Cultura de Fene. Do mércores 8 de marzo ao xoves 20 de abril amosarase neste espazo a exposición colectiva “Xeitos”, formada por 34 fotografías de 17 autores vencellados á sección de fotografía do Grupo Bazán. Trátase de: Alejandro Martínez, Antonio Carrete, Bea Rodríguez, Carlos Cruz, Chus Villamar, David Souto, Fer Cendán, Fran Suárez, Gelis López, José Amigo, Luis Losada, Luz González, Marcos García, Miguel Llano, Mónica Lorenzo, Pablo Mauriz e Pepe Botella. A mostra recolle os seus diferentes estilos e miradas, amosando a pluraridade do grupo e reflectindo distintos “xeitos de ollar, sentir, imaxinar, soñar…”
27-02-2023
“Achegar os escolares galegos ao mundo da banda deseñada, fomentando a súa creatividade dende unha perspectiva humorística” é o principal obxectivo do concurso de banda deseñada e humor “Demo pequeno” que promoven o Museo do humor Xaquín Marín e Demo Editorial. O certame, para o que xa está aberto o prazo de presentación de obras, vai dirixido a mozos e mozas galegos de 8 a 16 anos, que poderán participar de xeito individual ou por equipos de dúas persoas (guionista e debuxante). Valorarase “a composición do debuxo e o uso de diferentes técnicas pictóricas pero tamén a propia historia e o sentido humorístico da mesma”. O prazo de presentación de orixinais finalizará na medianoite do venres 30 de abril de 2023.
24-02-2023
O vindeiro luns, 27 de febreiro, inaugúrase na Casa da Cultura de Fene a exposición sobre o circo que o alumnado e profesorado do CPR Jorge Juan Perlío elaborou neste curso, no marco do seu proxecto escolar anual. O acto será ás 16 horas e contará coa presenza do alcalde de Fene, Juventino Trigo, do Concelleiro de Cultura, Justo Ardá, do director do colexio, Ángel del Río Correa, e da representante da Anpa Sonia Fernández Veiga. A exposición permanecerá aberta ao público do luns 27 ao sábado 4 de marzo, en horario, de luns a venres, de 10 a 13 e de 16 a 20 horas, e o sábado, de 10 a 13 horas. Ademais, ao longo da semana, proxectarase na Casa da Cultura algunha producción cinematográfica con temática circense para animar á comunidade escolar do centro e á veciñanza en xeral a visitar a exposición.