24-02-2023
O vindeiro luns, 27 de febreiro, inaugúrase na Casa da Cultura de Fene a exposición sobre o circo que o alumnado e profesorado do CPR Jorge Juan Perlío elaborou neste curso, no marco do seu proxecto escolar anual. O acto será ás 16 horas e contará coa presenza do alcalde de Fene, Juventino Trigo, do Concelleiro de Cultura, Justo Ardá, do director do colexio, Ángel del Río Correa, e da representante da Anpa Sonia Fernández Veiga. A exposición permanecerá aberta ao público do luns 27 ao sábado 4 de marzo, en horario, de luns a venres, de 10 a 13 e de 16 a 20 horas, e o sábado, de 10 a 13 horas. Ademais, ao longo da semana, proxectarase na Casa da Cultura algunha producción cinematográfica con temática circense para animar á comunidade escolar do centro e á veciñanza en xeral a visitar a exposición.
05-12-2022
Ás oito do serán inaugúrase na Casa da Cultura de Fene a exposición “Heteroxénea”, do zamorano Francisco Pérez Alonso. Trátase dunha mostra de pintura, escultura e reproducións de instrumentos musicais realizados, a maioría, en madeira. Na pintura, salientan as obras cinéticotemáticas pertencentes ás series “Ferrol cineticotemático”, “Ferrol-Ucha” e “Madrid cineticotemático”. Tamén se inclúen cadros dunha serie libre e esculturas realizadas en pizarra, madeira, aceiro inox ou pedra. A mostra poderá visitarse até o vindeiro 30 de decembro en horario: de luns a venres, de 10.00 a 13.00 horas e de 16.00 a 21.00 horas; os sábados, de 10.00 a 13.00 horas; e domingos e festivos, pechado. A partir do 23 de decembro (inclusive), o horario será: de luns a venres, de 10.00 a 14.15 horas; e os sábados, domingos e festivos, pechado.
23-11-2022
Memorias dunha rapasa da costa. É o título do espectáculo que presenta este venres no Museo do Humor Xaquín Marín a cómica, actriz e presentadora de espazos de entretemento (Malo será, De quen vés sendo?…) Marta Doviro. Trátase do primeiro monólogo da artista, un “exercizo cómico sobre a nosa forma de ser e de facer, en contraposición ao que os medios e o cine nos poñen como modelo”. A función comezará o venres, 25 de novembro, ás 20 horas, con entrada libre e de balde. Espectáculo para público adulto.
16-11-2022
A Casa da Cultura de Fene acolle este venres, 18 de novembro, unha nova sesión do ciclo de monólogos que organiza o Museo do Humor Xaquín Marín para conmemorar o seu aniversario. O protagonista desta terceira sesión, que comezará ás 20 horas, será o actor e monologuista Oswaldo Digón cun espectáculo titulado “Outra movida”, dirixido a público adulto. Entrada de balde até completar o aforo (100 localidades).
09-11-2022
No mes do seu aniversario, o Museo do Humor Xaquín Marín continúa a propoñer tardes de contos e humor como a que organiza para este venres, 11 de novembro, no marco do ciclo “Novembro, mes do Humor”. A protagonista desta segunda sesión, prevista para as 20 horas, será a contacontos María da Pontragha cun espectáculo de narración oral titulado “Coa palabra na boca”, dirixido a público adulto. Entrada de balde até completar o aforo (100 localidades).
03-11-2022
Coincidindo coa inauguración da exposición e a entrega dos Premios Curuxa 2022, comeza este venres no Museo do Humor Xaquín Marín o ciclo de monólogos “Novembro, mes do Humor”. Nesta primeira función, prevista para as 20.00 horas, subirán ao escenario Marita Martínez e Lucía Veiga, as Izquierdo Sisters, cunha proposta escénica hilarante pero terrorífica á vez, “Galician horror story”. A entrada ao espectáculo, dirixido a público adulto, será de balde até completar o aforo (100 localidades).
02-11-2022
O Museo do Humor Xaquín Marín entrega este venres os Premios Curuxa 2022
A entrada ao acto será libre até completar o aforo dispoñible
Coa entrega dos premios Curuxa do Humor 2022, o Museo do Humor Xaquín Marín comeza este venres, 4 de novembro, as actividades do seu aniversario. Nun acto que comezará ás 20 horas no salón de actos da Casa da Cultura, os debuxantes Ricardo Olivera Almozara, “Fritz”, Manuel Alejandro Vázquez Búa, Pedro Bouza Bernárdez e Andrés Chinchilla Argibay recibirán da man do alcalde de Fene, Juventino Trigo, e do concelleiro de Cultura, Justo Ardá, os diplomas que os acreditan como gañadores do certame este ano. Unha hora antes, ás 19 horas, representantes da Corporación Municipal de Fene recibirán aos autores premiados na sala de exposicións temporais do museo onde se amosarán, até finais do mes de novembro, os debuxos premiados e unha selección das obras que se presentaron este ano ao certame.
28-10-2022
O venres 4 de novembro bota a andar no Museo do Humor Xaquín Marín o ciclo de monólogos “Novembro, mes do Humor” que organiza anualmente o Concello de Fene para conmemorar o aniversario deste centro. Catro espectáculos compoñen o programa desta edición que contará coas actuacións das Izquierdo Sisters (4 de novembro), María da Pontragha (11 de novembro), Oswaldo Digón (18 de novembro) e Marta Doviro (25 de novembro). A primeira función, o venres 4 ás 20 horas, coincidirá coa apertura e inauguración da exposición dos Premios Curuxa 2022 e coa entrega dos galardóns do certame de humor gráfico que organiza anualmente o museo fenés. A entrada para todos os espectáculos, dirixidos a público adulto, será de balde até completar o aforo (80 localidades).
03-10-2022
A Casa da Cultura de Fene acolle desde este martes a exposición de fotografía “Os soños esquecidos”, de Carlos Muíños. A mostra, formada por unhas corenta obras, reflicte espazos abandonados (vertente fotográfica que adoita coñecerse coma “urbex”). Son fotografías realizadas a partir de 2017 en lugares esquecidos de Galicia, Asturias e Portugal. “Os soños esquecidos” amosarase en Fene até o vindeiro 30 de outubro en horario de luns a venres, de 10.00 a 13.00 e de 16.00 a 21.00 horas, e os sábados, de 10.00 a 13.00 horas.
03-08-2022
Poucas persoas hai en Fene, de nacemento ou adopción, que conciten tanto afecto xeral como Xaquín Marín Formoso. E motivos sobran. Creador polifacético, dinamizador cultural, reivindicador e un dos máximos expoñentes do humorismo retranqueiro galego posto ao servizo da crítica social. Son moitos os méritos que, sen el pretendelo, se xuntan nun home xa de por si afable e sempre conciliador. Un bo e xeneroso, vaia, que hai case 40 anos teimou en crear o primeiro museo do mundo dedicado ao humor. Fene recoñeceulle durante maio e xuño todo o seu labor a prol do municipio e da Cultura por medio do programa "Volta á orixe", que contou con centos de asistentes á exposición monográfica e ás actividades paralelas. Agora, como culminación deste merecido tributo, o pleno municipal votará na mañá deste xoves o cambio de denominación do Museo do Humor para que pase chamarse "Museo do Humor de Fene: Xaquín Marín".