O alcalde de Fene e representantes de varias sociedades culturais, deportivas e de ensino do termo municipal asinaron este mediodía os convenios das Subvencións Nominativas do ano 2024. Os convenios ascenden a un total de 39.100 € para as entidades culturais, 7.500 € para as entidades de ensino e 5.000 € para as deportivas (51.600 € en total). Con anterioridade xa foron asinados os convenios coas sociedades AC Felicia e Centolos AC, por un importe de 11.000 € para cada un deles.

O Salón de Plenos do Concello de Fene acolleu esta semana o acto de clausura do Obradoiro de emprego Inicia VII. O alcalde de Fene, Juventino Trigo, estivo acompañado no acto pola delegada territorial da Xunta en Ferrol, Martina Aneiros, e o alcalde de Cabanas, Fernando Couce.

Durante o acto, o alcalde de Fene trasladou os parabéns do Concello de Fene ao alumnado – traballador que completou a súa formación, e amouse convencido de que esta experiencia “permitiralles mellorar a súa empregabilidade, facilitando a inserción no mercado laboral”.

O Obradoiro foi promovido polos concellos de Fene, Ares, Cabanas e Mugardos, e contou cunha subvención da Consellaría de Emprego, Comercio e Emigración, dentro da iniciativa de emprego xuvenil e o Programa Operativo Fondo Social Europeo Plus (FSE+) Galicia 2021 – 2027.

O Concello de Fene inicia unha nova edición do programa “Refórzate”, destinado a apoiar ao alumnado de primaria e secundaria con dificultades de aprendizaxe ou en situación de vulnerabilidade. O proxecto, desenvolto conxuntamente cos concellos de Fene, Neda e Mugardos e financiado pola Consellaría de Sanidade, ten como obxectivo promover o desenvolvemento individual, social e emocional das e dos menores a través de sesións de apoio educativo e actividades lúdicas e saudábeis.