Aberto o prazo de inscrición para asistir ao espectáculo "Güe-güe", de Barriga Verde, co que a biblioteca municipal de Fene conmemorará este xoves, 15 de maio, ás 18.00 horas, o Día das Letras Galegas. Nesta función de monicreques, dirixida a nenos/as a partir de 1 ano, “descubriremos nunha noite de lúa chea, que é un Güe-güe; para iso teremos que atopar algo moi pequeno e con moita imaxinación, e así, coa súa axuda, aprenderemos valores tan importantes como a igualdade e o respecto ás persoas e cousas que nos rodean”.

Reserva de prazas ata o xoves 15 de maio na biblioteca de Fene, de 16.00 a 21.00 horas, ben presencialmente ou por teléfono (981342302 / 607625346).

O Concello de Fene celebrou esta mañá un pleno extraordinario para tomar coñecemento oficial da renuncia de Juventino Trigo como alcalde e concelleiro, formalizando así unha decisión anunciada hai unha semana. Desde hoxe, e até a celebración do pleno de elección da nova alcaldesa, Sandra Permuy, actual primeira tenente de alcalde, asumirá a alcaldía de forma accidental.

Na súa última intervención ante a corporación, Trigo despediuse con emoción tras 14 anos na política municipal, dos cales oito foron como alcalde e case seis desde a oposición. “Todos os cargos son temporais. Despois de catorce anos exercendo responsabilidades públicas, chegou a hora de dicir adeus, e dígoo agradecido e emocionado”, afirmou.

A decisión, sinalou, foi “moi meditada, tomada con responsabilidade e pensando sempre no mellor para o noso Concello e para a nosa veciñanza”. Trigo reivindicou a política municipal como “un proxecto colectivo, vivo e dinámico” no que “o relevo é necesario para seguir medrando, para incorporar novas ideas, novas enerxías e novas maneiras de facer”.

Os coidados, dar e recibir, a xestión do estrés, o autocoidado e a autoestima. Son algunhas das cuestións que se abordarán o vindeiro luns, 12 de maio, ás 18.30 horas, nunha nova sesión do ciclo para familias "Máis que un teito", organizado polas Concellerías de Servizos Sociais dos Concellos de Fene, Mugardos e Neda. A sesión será impartida por Naira González Fontenla, educadora social e psicopedagoga. O encontro desenvolverase no salón de actos da Casa da Cultura de Fene e, para asistir, cómpre inscribirse, indicando se precisa servizo de conciliación para atender ás crianzas. Prazas limitadas (30)