Trala publicación do extracto das bases no Boletín Oficial da Provincia núm. 34, do venres 20 de febreiro de 2026, o Concello de Fene informa da apertura do prazo para presentar obras a unha nova edición dos “Premios Curuxa” do Museo do Humor Xaquín Marín. As persoas interesadas en participar poderán enviar ou presentar os seus debuxos no Rexistro Xeral municipal até o vindeiro 31 de maio. Como novidade, o concurso vai dirixido este ano a artistas residentes na Península Ibérica (España e Portugal), ampliando o seu ámbito xeográfico xa que, até o de agora, podían participar no certame unicamente persoas residentes no estado español.
Novamente, nesta edición haberá tres categorías: Curuxa, para maiores de 25 anos; Curuxa Nova, para persoas con idades comprendidas entre os 16 e os 25 anos; e Caricatura, na que poderán participar debuxantes a partir dos 16 anos. E mantense a exclusión de obras realizadas total ou parcialmente con intelixencia artificial, estipulándose que calquera obra creada coa axuda da IA “quedará automáticamente excluida do certame. As obras deberán ser de creación manual ou dixital directa por parte do/da artista”.

Apareceron alá polo ano 2003, logo dun período de definición de dous ou tres anos. Naceron co novo século e primeiro foron publicadas en Terras de Santiago; logo no Correo Gallego até 2023; e no Galicia Dixital desde 2006 até hoxe, “así como noutros medios onde elas quixeron”. Pero ademais, as Historias de Icía e avoa, colección de tiras cómicas que saen do maxín da pintora e humorista gráfica Sabela Arias (Lugo, 1969) teñen o seu propio blog e IG, sempre están no Globo de Betanzos, e a partir deste sábado e até o vindeiro 7 de xaneiro, inundarán a sala de exposicións temporais do Museo do Humor Xaquín Marín.

“Pensabades que morrera, pero estaba de parranda!” Aturuxando desde o cumio do monte Pindo, volve a máis importante superheroína galega, Nabiza Girl, acompañada nesta aventura polo seu fiel escudeiro, Don Galizo, para loitar contra as inxustizas e os problemas que asolagan a nosa terra. Este venres, 28 de novembro, Nabiza Girl, personaxe interpretado pola actriz e humorista Isabel Risco, visita Fene para pechar o ciclo de monólogos Novembro, mes do humor. A cita será novamente ás 20.00 horas e a entrada de balde, aínda que con invitación que se poderá recoller (máximo dúas por persoa adulta) na conserxería da Casa da Cultura de Fene ese mesmo día a partir das 19 horas. Aforo limitado.