O Concello de Fene vén de dar inicio ás obras de mellora da rede de pluviais e pavimentos en Buios, unha actuación clave para optimizar a seguridade e a accesibilidade da zona. Os traballos, adxudicados por 179.740,26 euros con financiamento do Plan Único de Concellos (POS+ 2024) da Deputación da Coruña, teñen un prazo de execución de tres meses.

O alcalde, Juventino Trigo, e o concelleiro de Obras, Manuel Polo, desprazáronse até a zona afectada para supervisar in situ as actuacións previstas. Trigo destacou que "estas melloras responden ao compromiso do goberno local de renovar as infraestruturas municipais e mellorar a calidade de vida da veciñanza, garantindo espazos máis seguros e accesibles". Pola súa banda, Manuel Polo subliñou que "esta intervención atende unha demanda veciñal histórica e permitirá optimizar tanto o firme como a canalización das augas pluviais, evitando problemas de drenaxe".

O vindeiro luns, 7 de abril, ás 18.30 horas, a Casa da Cultura acollerá unha nova sesión do ciclo para familias "Máis que un teito", organizado polas Concellerías de Servizos Sociais dos Concellos de Fene, Mugardos e Neda. A sesión será impartida por Naira González Fontenla, educadora social e psicopedagoga.

Do 4 ao 22 de abril a sala de exposicións temporais da Casa da Cultura de Fene acollerá a exposición do XVIII Premio Internacional Jesús Núñez, convocado pola Deputación da Coruña. A mostra recolle unha selección dos mellores traballos presentados a este concurso internacional de arte gráfico. Nesta edición houbo 118 participantes, dos cales 58 foron españois (15 madrileños e 13 galegos) e os 60 restantes procederon doutras 18 nacionalidades, sobre todo de México (14), Italia (11), Arxentina (9) e Polonia (8).