Novas

05-10-2026
05-10-2026

A Biblioteca Municipal abre o prazo de inscrición para asistir ao espectáculo de narración oral Onde viven os monstros

Nova sesión de contacontos na Biblioteca Municipal Xosemaría Pérez Parallé de Fene, desta vez baseada no conto clásico de Maurice Sendak. A compañía Os Náufragos Teatro trae a Fene este xoves, 8 de outubro, ás 18 horas, a tenra historia de Max, un neno que, logo dun ataque de carraxe, adéntrase nun mundo salvaxe habitado por monstros. A través da narración oral, o xesto, as marionetas, a música e a participación do público, con este espectáculo -dirixido a nenas e nenos de 4 a 8 anos- preténdese acompañar ás crianzas no recoñecemento das súas emocións, especialmente a ira, o medo e o desexo de pertenza.

Para asistir á función deste xoves na biblioteca, cómpre inscribirse previamente por teléfono (981 342 302 ou 607 625 346) ou presencialmente no horario da biblioteca (de luns a venres, de 16.00 a 21.00 horas). Prazas limitadas.
Ver máis
30-09-2026
30-09-2026

Cultura para todas desde Fene

A xornada Cultura para todas, acceso e inclusión nas actividades culturais, da Deputación da Coruña, reuniu onte á tarde na Casa da Cultura de Fene a unha nutrida representación das asociacións culturais e veciñais do Concello de Fene.
A actividade, centrada de xeito práctico nas “barreiras que existen nos proxectos e espazos culturais, e nas medidas de accesibilidade que se poden aplicar para reducir ou eliminar esas barreiras” contou con intervencións de: Rubén Capelán, xestor cultural de Mada Producións especializado en accesibilidade cultural, consultor de accesibilidade e técnico de accesibilidade auditiva; Fran Carreira, arquitecto e usuario de cadeira de rodas que desempeña parte do seu labor como asesor voluntario en accesibilidade universal, colaborando con administracións e entidades para mellorar a inclusión nos espazos urbanos e edificados en Galicia; e Aitana García, técnica especialista en Accesibilidade Cognitiva e Sensorial na Federación Autismo Galicia.
Ver máis
23-09-2026
23-09-2026

A Biblioteca Municipal de Fene estreará a programación de outono cunha visita da Fada Diana

Danza, circo, maxia e música combínanse no espectáculo de narración oral A Fada Diana que a contacontos Ariadna Santana representará no salón de actos da Casa da Cultura de Fene o xoves 1 de outubro, ás 18.00 horas. A función, dirixida público de todas as idades aborda a cuestión da reciclaxe “para lembrarnos que o cambio só é posible coa colaboración de todas e todos en igualdade”. Entrada libre e de balde.
Coa súa maxia, a Fada Diana pretende motivar á mocidade e aos nosos maiores a coidar do planeta, demostrando que cada pequeno xesto conta e para crear un futuro mellor. Por que o seu lema é: Xuntas, podemos ser heroínas e heroes!
Ver máis
23-09-2026
23-09-2026

O Festival Internacional de Entes Animados trasládase este venres ao local da AVV Santa Eulalia de Limodre

A compañía brasileña Habid e Valeria protagonizará este venres en Limodre a segunda función do Festival Internacional de Entes Animados no Concello de Fene. Representará ás 20.00 horas no local da AVV Santa Eulalia a función de teatro de sombras con música O burro errante. Trátase dunha adaptación teatral do conto homónimo do escritor Habib Zahra, concebida e producida pola artista visual Valeria Rey, responsable tamén das ilustracións da obra orixinal.
O espectáculo nace dun proxecto familiar, reunindo Valeria aos seus fillos, Miguel Ibrahim e Dunya Clementina. Tamén contou coa colaboración de Jorge Rey, fundador da compañía española Títeres Cachirulo e responsable da dirección de montaxe, e de Rafael Rey, director da compañía española Nauta Teatro, pai e irmán de Valeria Rey, respectivamente.
Ver máis
22-09-2026
22-09-2026

Nova edición do Club de Lectura da Biblioteca Municipal de Fene

As persoas que desexen apuntarse neste club de lectura para público adulto poderán facelo desde o mércores 23 de setembro, presencialmente na propia biblioteca ou por teléfono no 981 342 302 ou 607 625 346, en horario de 16.00 a 21.00 horas (agás os sábados nos que o horario é de 10.00 a 13.00 horas). Para participar, unicamente cómpre ter interese pola lectura xa que as persoas que formen parte do club, deberán ler ao mesmo tempo as mesmas obras, de xeito individual. A biblioteca proporcionará un exemplar a cada membro do club, previamente inscrito.
O Club de Lectura da Biblioteca de Fene terá carácter mensual, realizándose as xuntanzas un mércores ó mes, de outubro de 2026 a maio de 2027, en horario de tarde, de 18.00 a 19.30 horas. O primeiro encontro será o mércores 28 de outubro.
Ver máis
18-09-2026
18-09-2026

Fene ultima os preparativos para unha nova edición do Fene Rock

O barrio de San Valentín prepárase para vivir desde esta noite unha nova edición do Fene Rock, unha das citas musicais máis consolidadas do municipio. A alcaldesa, Sandra Permuy, e o concelleiro de servizos, Adán Chao, achegáronse nas últimas horas ao recinto para avaliar xunto coa organización o desenvolvemento da montaxe e ultimar a coordinación dos medios municipais necesarios para a celebración do festival.
O Concello de Fene mantén un ano máis unha estreita colaboración coa organización, tanto a través dunha subvención nominativa de 11.000 euros como do apoio loxístico necesario para facer posible un evento destas características. A implicación municipal inclúe a colaboración do persoal da área de servizos, medios materiais e tarefas de limpeza e acondicionamento do recinto antes, durante e despois da celebración.
Ver máis
17-09-2026
17-09-2026

A compañía portuguesa Histeroscopio Teatro actúa este venres en Sillobre no marco do VIII Festival Internacional de Entes Animados

O certame, organizado pola Asociación Cultural Titerario coa colaboración dos concellos de Fene, Ares, Ferrol, Miño, Narón, Neda e Valdoviño, xunto coas asociacións Canido AC (Ferrol) e AC Apelón Educación (Mugardos) programa dúas funcións no Concello de Fene. A primeira será este venres,18 de setembro, ás 20.00 horas no local da SCRD Agarimo de Sillobre e terá como protagonista á compañía Histeroscopio Teatro (Portugal) co espectáculo “A galiña dos pitinhos de ouro”. Logo desta cita, o venres 25 de setembro, o Festival Internacional de Entes Animados trasladarase ao local da AVV Santa Eulalia de Limodre (20.00 horas), coa función de teatro de sombras con música de “O burro errante” da compañía Habid e Valeria de Brasil.
Ver máis
17-09-2026
17-09-2026

Fene acollerá unha das xornadas Cultura para todas, acceso e inclusión nas actividades culturais, da Deputación da Coruña

Xa está aberto o prazo de inscrición para participar nos encontros sobre accesibilidade cultural que a Área de Cultura da Deputación da Coruña organiza neste mes de setembro en catro concellos da provincia: Fene, Muros, Ordes e Arzúa. A cita en Fene será o martes 29 de setembro, de 16.00 a 20.00 horas, na Casa da Cultura e, baixo un enfoque práctico e útil, terá como obxectivo coñecer medidas concretas, reais e posibles de accesibilidade na nosa acción cultural. Para anotarse, cómpre enviar un correo electrónico ao Departamento de Cultura do Concello de Fene, indicando o nome e apelidos, correo electrónico, código postal e área profesional; ou cubrir o seguinte formulario de INSCRICIÓN.
Baixo o título Cultura para todas: acceso e inclusión nas actividades culturais, a xornada incluirá mesas específicas con intervencións impartidas por profesionais con ampla experiencia na materia como: Rubén Capelán, Fran Carreira e Aitana García.
Ver máis
11-09-2026
11-09-2026

Fene acollerá dúas funcións do Festival Internacional de Entes Animados que se celebrará nos vindeiros días en distintos concellos da bisbarra

Sete compañías procedentes de Reino Unido, Dinamarca, Portugal, Brasil, Arxentina e Galicia achegaranse até os concellos de Fene, Ares, Ferrol, Miño, Narón, Neda e Valdoviño, xunto coas asociacións Canido AC (Ferrol) e AC Apelón Educación (Mugardos) para presentar os seus espectáculos, no marco do VIII Festival Internacional Entes Animados que se celebrará do 12 ao 27 de setembro. O director artístico e membro da Asociación Cultural Titerario, Plamen Dipchikov e unha representación dos Concellos e entidades participantes, entre os que se atopaba a concelleira fenesa Ángeles Coira, presentaron o certame este xoves na Casa da Cultura de Neda.
As representacións desenvolveranse en centros cívicos sociais da zona rural e colexios entre o venres 12 e o 28 de setembro. Trátase de obras de pequeno e mediano formato a cargo de compañías tanto nacionais como internacionais, premiadas por especialistas e recoñecidas polo público.
Ver máis
10-09-2026
10-09-2026

Cambio de horario da Casa da Cultura de Fene

Coincidindo coa fin das vacacións escolares, a Concellería de Cultura informa dos cambios previstos no horario de apertura e atención ao público da Casa da Cultura de Fene (Biblioteca Municipal, Museo do Humor Xaquín Marín, aula de estudo e sala de exposicións temporais).
Así, a partir do vindeiro luns 14 de setembro (inclusive) retomarase o horario habitual de inverno desta instalación municipal: de luns a venres, de 10.00 a 13.00 horas e de 16.00 a 21.00 horas, e os sábados, de 10.00 a 13.00 horas.
Ver máis
1234567...35 36 >>