Novas

09-11-2026

A problemática das vespas asiáticas, as medidas para o seu control e primeiros auxilios no caso de picadura, temas da primeira sesión de Contando Ciencia

A sexta edición de Contando Ciencia comeza en Fene este xoves, 12 de novembro, co relatorio “Control da velutina e outras vespas asiáticas”, a cargo do responsable comarcal da Asociación Galega de Apicultura (AGA), Rafael Díaz Nieto. No devir desta charla -prevista para as 19.30 horas na Casa da Cultura con entrada libre e de balde- o técnico apícola e falará sobre os danos que conleva a velutina e o resto de avispas asiáticas asentadas en España (Soror en Asturias, Orientalis e Bicolor en Andalucía); do risco que supón para as persoas do rural; da incidencia nas produccións agrarias (apicultura, fruticultura e forestal) e no medio ambiente en xeral; e das medidas básicas para o seu control no rural, así como dos primeros auxilios no caso de ataque ou picadura destes insectos.
Rafael Díaz Nieto é técnico apícola e apicultor dende os 17 años e conta na actualidade con 150 colmeas en Ferrolterra e 80 na montaña Lucense. Amais de responsable comarcal da Asociación Galega de Apicultura (AGA) é presidente da Cooperativa APINOR (Apícola del Noroeste, primera cooperativa apícola creada en Galicia no 1986). 
09-11-2026

Xaquín Efrén Lago obtén a XXXIX edición do Premio Nacional de Poesía Xosemaría Pérez Parallé

Xaquin Efrén Lago Díaz, nado en Ferrol en 1979, obtivo hoxe a XXXIX edición do Premio Nacional de Poesía Xosemaría Pérez Parallé, que convoca o Círculo Mercantil e Industrial-Unidade de Fene, co apoio do Concello de Fene.
O xurado escolleu o libro de Lago, titulado deriva de entre as 56 obras presentadas a concurso este ano.
05-11-2026

Cunha conferencia do responsable comarcal da Asociación Galega de Apicultura comezará a vindeira semana a sexta edición de Contando Ciencia

Volve Contando Ciencia, un programa que retoma a súa actividade co novo curso escolar “co obxectivo de achegar a ciencia á poboación en xeral”. Aberto a todo tipo de público, todas as conferencias terán lugar na Casa da Cultura, un xoves ao mes e sempre ás 19:30 con entrada gratuíta. Ciclo organizado pola Concellería de Ensino de Fene coa colaboración do IES de Fene e baixo a coordinación da mestra Violeta Miraz Seco.
Contando Ciencia 2026-27 principiará o xoves 12 de novembro co relatorio “Control da velutina e outras vespas asiáticas”, a cargo do responsable comarcal da Asociación Galega de Apicultura (AGA), Rafael Díaz Nieto.
03-11-2026

Risas con “Dous no camiño” este domingo en Sillobre

Isabel Risco e Fran Rei protagonizan a función teatral Dous no camiño (As lendas Xacobea como nunca chas contaron) que se poderá ver este domingo, ás 11.30 horas, na SCRD. Agarimo de Sillobre, con entrada libre e de balde (función aprazada do pasado 17 de outubro).
Dirixida por Avelino González a partir de textos de Roi Vidal e Xurxo Barcala, trátase dunha revisión e actualización a través do humor e o descaro das lendas xacobeas máis populares: a de Roldán, o cabaleiro francés, a da barca de pedra de Muxía e a do traslatio do Apóstolo Santiago de Compostela. Sempre en ton cómico, mais mantendo a esencia destas historias máxicas.
 
19-10-2026

O Outono das artes recala esta semana en Fene

Coa proxección do documental “Ao son da nova regueifa” no IES de Fene bota a andar este martes o ciclo Outono das artes no Concello de Fene. Promovido pola Deputación da Coruña, o programa inclúe tres actividades no termo municipal, comezando pola proxección este martes para o alumnado do IES de Fene do documental de Manolo Maseda e Saúl Rivas que “percorre Galicia para explorar a renovación da regueifa con voces novas, música e improvisación”.
A maiores, tamén esta semana no marco do Outono das artes, anúncianse dúas funcións abertas ao público xeral no salón de actos da Casa da Cultura. O xoves 22, ás 18 horas, proxectarase o documental Crónicas da Galiza Mártir e o venres 23 habera un espectáculo infantil, Esperta rinoceronte, a cargo de Nao caracola.
17-10-2026

Ao son da nova regueifa no IES de Fene

No marco do programa Outono das artes, o Concello de Fene, coa colaboración da Deputación da Coruña, leva ao IES de Fene o documental Ao son da nova regueifa, documental dirixido por Manolo Maseda e Saúl Rivas que “percorre Galicia para explorar a renovación desta arte con voces novas, música e improvisación”. A proxección desta peza audiovisual, dirixida ao alumnado e profesorado do centro, está prevista para o vindeiro martes, 20 de outubro, ás 16.30 horas.
“Todo comeza cunha busca, a da Nova Regueifa. Nese proceso, rematamos decatándonos de que xa estamos camiñando ao son dela”. O documental Ao son da nova regueifa propón unha viaxe na procura das pontes construídas entre a Regueifa tradicional e as súas expresións máis contemporáneas, afondando no proceso de recuperación e transformación desta arte da improvisación oral na Galiza.
13-10-2026

Isabel Risco e Fran Rei son “Dous no camiño” no espectáculo que o Concello de Fene leva este sábado a Sillobre

A SCRD Agarimo acollerá o vindeiro sábado, 17 de outubro, ás oito do serán, a función teatral Dous no camiño (A lenda Xacobea), dirixida por Avelino González a partir de textos de Roi Vidal e Xurxo Barcala, e cos cómicos Fran Rei e Isabel Risco á fronte.
Trátase dunha revisión e actualización a través do humor e o descaro das lendas xacobeas máis populares: a de Roldán, o cabaleiro francés, a da barca de pedra de Muxía e a do traslatio do Apóstolo Santiago de Compostela. Sempre en ton cómico, mais mantendo a esencia destas historias máxicas.
05-10-2026

A Biblioteca Municipal abre o prazo de inscrición para asistir ao espectáculo de narración oral Onde viven os monstros

Nova sesión de contacontos na Biblioteca Municipal Xosemaría Pérez Parallé de Fene, desta vez baseada no conto clásico de Maurice Sendak. A compañía Os Náufragos Teatro trae a Fene este xoves, 8 de outubro, ás 18 horas, a tenra historia de Max, un neno que, logo dun ataque de carraxe, adéntrase nun mundo salvaxe habitado por monstros. A través da narración oral, o xesto, as marionetas, a música e a participación do público, con este espectáculo -dirixido a nenas e nenos de 4 a 8 anos- preténdese acompañar ás crianzas no recoñecemento das súas emocións, especialmente a ira, o medo e o desexo de pertenza.

Para asistir á función deste xoves na biblioteca, cómpre inscribirse previamente por teléfono (981 342 302 ou 607 625 346) ou presencialmente no horario da biblioteca (de luns a venres, de 16.00 a 21.00 horas). Prazas limitadas.
30-09-2026

Cultura para todas desde Fene

A xornada Cultura para todas, acceso e inclusión nas actividades culturais, da Deputación da Coruña, reuniu onte á tarde na Casa da Cultura de Fene a unha nutrida representación das asociacións culturais e veciñais do Concello de Fene.
A actividade, centrada de xeito práctico nas “barreiras que existen nos proxectos e espazos culturais, e nas medidas de accesibilidade que se poden aplicar para reducir ou eliminar esas barreiras” contou con intervencións de: Rubén Capelán, xestor cultural de Mada Producións especializado en accesibilidade cultural, consultor de accesibilidade e técnico de accesibilidade auditiva; Fran Carreira, arquitecto e usuario de cadeira de rodas que desempeña parte do seu labor como asesor voluntario en accesibilidade universal, colaborando con administracións e entidades para mellorar a inclusión nos espazos urbanos e edificados en Galicia; e Aitana García, técnica especialista en Accesibilidade Cognitiva e Sensorial na Federación Autismo Galicia.
23-09-2026

A Biblioteca Municipal de Fene estreará a programación de outono cunha visita da Fada Diana

Danza, circo, maxia e música combínanse no espectáculo de narración oral A Fada Diana que a contacontos Ariadna Santana representará no salón de actos da Casa da Cultura de Fene o xoves 1 de outubro, ás 18.00 horas. A función, dirixida público de todas as idades aborda a cuestión da reciclaxe “para lembrarnos que o cambio só é posible coa colaboración de todas e todos en igualdade”. Entrada libre e de balde.
Coa súa maxia, a Fada Diana pretende motivar á mocidade e aos nosos maiores a coidar do planeta, demostrando que cada pequeno xesto conta e para crear un futuro mellor. Por que o seu lema é: Xuntas, podemos ser heroínas e heroes!