Dixomedíxomes

Museo do Humor   Dixomedíxomes
12-07-2021

Alexandre Sequeiros Camiña e Nuria Martínez Carbó son os gañadores do XXV Concurso de Humor Gráfico Curuxa do Humor de Fene

Logo das oportunas deliberacións, na xuntanza celebrada este mediodía no Museo do Humor de Fene, o xurado do XXV concurso de humor gráfico Curuxa do Humor acordou outorgar a Alexandre Sequeiros Camiña o primeiro premio Curuxa (categoría para maiores de 25 anos) e a Nuria Martínez Carbó o primeiro premio Curuxa Nova (categoría de 16 a 25 anos). Así mesmo, Fernando Iglesias Mouta, "Kohell", e Sarai Outeiral Ces alzáronse co segundo premio nas categorías Curuxa e Curuxa Nova, respectivamente.
07-07-2021

Xuntanza do xurado do XXV Concurso de Humor Gráfico Curuxa do humor 2021

Os debuxantes Calros Silvar, Xosé Tomás e Hugo Feal Permuy (gañador do primeiro premio Curuxa Nova 2020) forman parte do xurado dos Premios Curuxa 2021 que se reunirá o vindeiro luns, 12 de xullo, ás 12.00 horas no Museo do Humor de Fene. Tal e como se establece nas bases do certame, o xurado estará presidido polo alcalde de Fene, Juventino Trigo e -xunto cos tres debuxantes convidados- formarán parte do mesmo o concelleiro de Cultura, Justo Martínez, e a responsable do Museo do Humor, Almudena Marcos (que actuará como secretaria).
05-07-2021

O ciclo Humor Peregrino trae este venres a Fene as Historias de Arrepío de Paula Carballeira

O salón de actos da Casa da Cultura acolle este venres, ás 21 horas, a segunda función do ciclo “Humor peregrino”, actividade que se encadra no proxecto Viñetas do Camiño (O Teu Xacobeo) que están a desenvolver as Concellerías de Cultura e Turismo. A protagonista desta nova sesión será a fenesa Paula Carballeira cun espectáculo titulado “Historias de arrepío” no que se recollen contos que xorden “das longas e escuras noites con néboa ás portas”. A entrada será libre, de balde e con aforo limitado (50 persoas), atendendo a normativa Covid actualmente en vigor.
30-06-2021

Ukestra do Medio protagoniza este venres a primeira sesión do ciclo Humor Peregrino

O son dos ukeleles chega este venres 2 de xullo ao Concello de Fene da man de Ukestra do Medio, grupo compostelán que realiza versións de clásicos do rock’n’roll, country, swing, pop e mesmo de músicas tradicionais galegas e portuguesas, tangos, bossanovas, cumbias ou boleros. A función comezará o venres ás 21 horas no salón de actos da Casa da Cultura, con entrada libre, de balde e aforo limitado (50 persoas), atendendo a normativa Covid actualmente en vigor. Con este espectáculo, comeza o ciclo “Humor peregrino” que se enmarca no proxecto Viñetas do Camiño (O Teu Xacobeo), impulsado polas concellerías de Cultura e Turismo de Fene.
29-06-2021

A exposición O Camiño das Estrelas: tecendo culturas, de María José Rodríguez amósase en xullo na Casa da Cultura

Este venres, ás 13.00 horas, inaugúrase na Casa da Cultura de Fene a mostra “O Camiño das estrelas: tecendo culturas”, da artista María José Rodríguez. No acto, a pintora estará acompañada polo alcalde de Fene, Juventino Trigo, e polo concelleiro de Cultura, Justo Ardá. A exposición permanecerá nesta instalación municipal até o vindeiro 29 de xullo e poderá visitarse de luns a venres, de 10.00 a 14.15 horas. Sábados, domingos e festivos, a sala de exposicións permanecerá pechada.
18-06-2021

O vindeiro mércores cambia o horario da Biblioteca, Museo do Humor e Casa da Cultura de Fene

Coa chegada do verán, a concellería de Cultura informa do cambio de horario da Casa da Cultura de Fene (Biblioteca Municipal, aula de estudo, Museo do Humor e sala de exposicións temporais) que coincidirá, como é habitual, co comezo das vacacións escolares. Así, dende o mércores 23 de xuño e até o vindeiro 8 de setembro, inclusive, o horario da instalación será de luns a venres, de 10.00 a 14.15 horas. Sábados, domingos e festivos, a Casa da Cultura de Fene permanecerá pechada.
15-06-2021

Xaquín Marín Formoso, gañador na categoría de "persoas" do XII premio Rosalía de Castro de Lingua da Deputación da Coruña.

O alcalde, Juventino Trigo, e o Goberno Municipal de Fene felicitan ao debuxante fenés Xaquín Marín Formoso, gañador na categoría de "persoas" do XII premio Rosalía de Castro de Lingua da Deputación da Coruña. 

Á hora de outorgar o recoñecemento, o xurado do certame valorou" o compromiso continuado no tempo, o alcance social do seu traballo e o feito de facer humor gráfico nun contexto histórico de especial dificultade en plena ditadura franquista e en medios de comunicación onde a presenza do galego era residual". 

A candidatura de Xaquín Marín ao certame provincial foi presentada polas áreas de Museo e Normalización Lingüística, co apoio da concellería de Cultura e do Goberno Municipal de Fene. 

No mesmo certame, tamén acadaron recoñecemento a Agrupación Astronómica Coruñesa Ío, na categoría de entidades, e o Twitter en galego, para iniciativas de xente nova.
Máis información sobre o premio, na web da Deputación da Coruña  
https://bit.ly/3pTJzXO
09-06-2021

A andaina debuxada encherá este fin de semana de creatividade o Camiño Inglés

O Camiño Inglés ao seu paso por Ferrolterra acolle esta fin de semana a Andaina Debuxada que organiza o Concello de Fene no marco do proxecto “Viñetas do Camiño”, impulsado desde as súas concellerías de Turismo e Cultura ao abeiro do programa O Teu Xacobeo da Xunta de Galicia. A ruta está organizada en dúas etapas, o sábado pola mañá e pola tarde e o domingo pola mañá, con paradas nos seis concellos polos que discorre a ruta nas que estarán debuxando destacados artistas da contorna.

Hai arredor de medio cento de persoas inscritas para empregar os autobuses gratuítos que o Concello de Fene dispuxo para a volta. A marcha organizarase, coa axuda de Protección Civil, en grupos de vinte persoas nos que haberá que cumprir o distanciamento e demáis medidas establecidas para as actividades de natureza.
04-06-2021

“I encontro de ilustradores" para reflexionar sobre a promoción do Camiño Inglés a través das artes visuais

O Concello de Fene reunirá o vindeiro día 11 a cinco recoñecidos artistas da comarca no “I Encontro de Ilustradores”, unha actividade do proxecto “Viñetas do Camiño”, que promoven as concellerías de Cultura e Turismo no marco do programa O Teu Xacobeo da Xunta de Galicia. A cita terá lugar no Museo do Humor ás 20.00 horas e ten como obxectivo á reflexión acerca do Camiño Inglés, os seus valores e a súa promoción dende as artes visuais.
Elga Fernández Lamas, Blanca Escrigas, Beatriz Seijo, Calros Silvar e Eduardo Hermida protagonizarán o encontro, no que se quere crear un espazo de traballo dende o que afondar de forma conxunta no Camiño Inglés en Ferrolterra, a través dunha perspectiva patrimonial, paisaxística e humana. A actividade quere servir para establecer posibles vías de colaboración entre artistas, incluso a nivel estatal, como canle para difundir os valores Xacobeos e a riqueza patrimonial asociada ao Camiño.
Para elo, os participantes analizarán distintas experiencias na promoción de itinerarios similares ao compostelán como base para a súa posible aplicación a este. Da mesma forma, exporán outros proxectos nos que teñen traballado neste mesmo senso.
O Encontro de Ilustradores estará aberto ao público ata que o aforo da sala estea completo.
03-06-2021

II mostra do alumnado do Laboratorio de Creación Artística Laudas Calamity na Casa da Cultura de Fene

A exposición “Yokais: monstros, pantasmas e outros seres do Laboratorio”, do alumnado Laudas Calamity, abre ao público este venres na Casa da Cultura de Fene. Trátase dunha exposición colectiva que xira entorno á temática do folclore xaponés, concretamente sobre o mundo dos monstros e pantasmas, tamén coñecidos coma Yokais. A mostra inaugúrase este mesmo venres, ás 18.30 horas pero a asistencia será con invitación previa e aforo limitado para cumprir cos protocolos Covid de seguridade e hixiene actualmente en vigor.