Barallobre
Casa indiana construída no segundo terzo do século XX por José García que foi emigrante en Cuba. A planta é rectangular duns 6 por 10 metros, e consta de soto e dúas alturas: baixo e o baixocuberta, ambas as dúas dedicadas a vivenda. A cuberta é a dúas augas con tella plana.
Na fachada lateral dereita ten apegada unha ampla galería de formigón como material estrutural. Unha característica desta edificación é que conta con portas de acceso en dúas das súas fachadas o que responde ao feito de que durante anos nesta vivenda funcionaba unha tenda de ultramarinos e bar.
Así, na fachada lateral esquerda conta con tres ocos, dúas ventás e unha porta no centro. Na fachada principal repite esta distribución de ocos de dúas ventás, unha a cada lado da porta, aínda que nesta engádese a existencia dun balcón no baixocuberta. A cuarta das fachadas conta tamén con balcón no baixocuberta e dúas ventás na planta baixa. Neste caso a porta desprázase debido á pendente do terreo até o soto.
Todo o conxunto amosa unha intención de sinxeleza e simetría, remarcada esta pola repetición da ornamentación empregada nos linteis das ventás e nos forxados dos antepeitos de estilo modernista e trazado xeométrico por un lado e nos linteis do balcón e das portas, así como nos esquinais da edificación de formas máis xeométricas.