Casa de José Dobarro García na Porta do Sol
Inicio Fene descúbreo Patrimonio histórico Casa de José Dobarro García na Porta do Sol
Fene
![Casa de José Dobarro García na Porta do Sol](../../../media/../media/img/casindiportasol2.jpg)
Esta vivenda situada na Avenida Porta do Sol, foi construída por José Dobarro García, que estivo emigrado en Cuba, a partir doutras vivendas anteriores existentes nese lugar. Conta con dúas plantas e baixocuberta, e cun tellado a dúas augas.
Ten anexionados nas fachadas laterais dous volumes dunha planta, o da esquerda prolongación da vivenda, e dedicado a garaxe o outro. Tamén na fachada esquerda, e sobre ese volume anexo, elévase unha ampla galería na planta alta, de factura tradicional que está cuberta por un pequeno tellado.
A fachada principal presenta unha disposición peculiar ao contar con catro ocos tanto na planta baixa como na alta, e ten no primeiro caso dúas ventás e dúas portas que se alternan, rompendo deste xeito a simetría do conxunto; no segundo trátase de catro balcóns con varandas a base de reixas de ferro forxado. Todos os ocos están coroados con arcos rebaixados, e os recercos presentan unha decoración moi sinxela a base de pequenas estrías. No baixocuberta existe un só oco polo que se accede a unha pequena galería. A decoración da fachada complétase co resalte do zócalo, as impostas, e fundamentalmente cas falsa cantería nos esquinais e coa moldura que decora os baixos do beiril da cuberta.