Antiga igrexa parroquial de San Salvador de Maniños
Inicio Fene descúbreo Patrimonio histórico Antiga igrexa parroquial de San Salvador de Maniños
Maniños
![Antiga igrexa parroquial de San Salvador de Maniños](../../../media/../media/img/igrexasansalvadormaninos.jpg)
Edificio de estilo barroco datado no século XVII, que ten como planta básica a de cruz latina, aínda que actualmente presenta dous engadidos no muro setentrional: un corpo rectangular que funciona como sacristía, e unha capela cuadrangular de pequeno tamaño.
A ornamentación mais subliñable do exterior atópase na fachada en que, sobre unha porta rectangular decorada con molduras e remarcada no centro por unha falsa clave en resalte, atópase un frontón circular partido no seu centro para deixar lugar a un nicho. A fachada remátase coa espadana de dous corpos: o inferior, con cabida para dúas campás, e o remate, con pequeno arco e coroado con pináculos como o resto da estrutura da que forma parte.
No interior, con cubertas de canón e aresta, destaca o coro alto ao que se accede por unha escaleira de cantería, realizada en 1830 por Luís Torrado, e o retablo de Manuel Fernández, do ano 1857. A cuberta, que segue a estrutura volumétrica do edificio, é de tella curva.