Sillobre
Na Corbeira atopamos esta vivenda rural que amosa unha serie de peculiaridades. Trátase dunha edificación de pequenas dimensións cunha planta case cadrada con baixo e faiado, e coa cuberta a dúas augas con tella plana. Os muros son de cachotería de granito.
A fachada principal está situada nun dos muros piñóns e conta alí cos únicos vans deste corpo, cunha porta central que ten unha ventá a cada lado, e cunha ventá tamén na altura do faiado. A vivenda conta con desenvolvemento perpendicular, xa que ten arrimado ao muro lateral esquerdo unha bodega con cuberta a unha auga que arranca dende o beiril do volume principal. Asemade presenta un desenvolvemento liñal no muro piñón traseiro ao que xustapón unha bodega baixa que continua os muros laterais da vivenda, e conta con cuberta a dúas augas.