CONCELLERÍA DE SERVIZOS SOCIAIS
Máis dun centenar de estudantes participaron nos obradoiros de bebidas saudables organizados polo Concello
21-04-2015
Máis dun centenar de estudantes e profesores tomaron parte nos Obradoiros de bebidas saudables organizados pola Concellería de Servizos Sociais que dirixe Juana Barro no marco do Programa de Prevención de Drogodependencias e Promoción da Saúde, en colaboración cos centros escolares. Os talleres, que buscan retrasar o inicio do consumo de alcol, dar a coñecer bebidas non alcólicas e favorecer o seu consumo, e que o alumnado dispoña de información, celebráronse o pasado venres, 17 de abril, no CPI A Xunqueira, e o pasado luns, día 20, no IES Fene.Están dirixidos ao alumnado de 1º e 3º da ESO e son impartidos por mestres de hostalería do IES Fraga do Eume, baixo a coordinación da pedagoga municipal. Nos mesmos ofrécese información, diferenciando as bebidas non alcólicas, os seus compoñentes e clasificación. A continuación, realízase unha demostración e, posteriormente, o alumnado escolle un combinado do recetario que se entrega previamente (batido e cóctel), elabórase e degústase.
Previamente, os estudantes deben cubrir un cuestionario para coñecer a información da que dispoñen sobre o alcol e que hábitos saudables teñen. Posteriormente, noutras sesións realízanse outras actividades onde se parte da información que o alumnado facilitou sobre o alcol, se aclaran dúbidas ou informacións erróneas e se racha cos tópicos existentes, ademais de realizar dinámicas para traballar a importancia da toma de decisións e a presión de grupo.