CONCELLERÍA DE DEPORTES
A Fenesa Noelia Cob Álvaro participará no campionato de Europa de Patinaxe Freestyle
30-09-2016
Con tan só 15 anos, Noelia Cob leva unha carreira meteórica no mundo do Freestyle. Dende hai dous anos, a patinadora fenesa forma parte da escola “Sobre rodas” de Ferrol aínda que non foi ata hai un ano que comezou a practicar a modalidade de salto.
Nos últimos meses, Noelia Cob acadou a medalla de ouro en salto (categoría xuvenil feminina) na 2ª etapa da Copa de España, celebrada en Vigo o pasado mes de xullo. Nesta mesma cita, outros dous patinadores de “Sobre rodas” acadaron resultados salientables: o tamén fenés Sergio Cob Álvaro quedou empatado co 3º clasificado na categoría absoluta e o ferrolán Jesús Mendez acadou a medalla de prata na categoría xuvenil masculina.
Posteriormente, a comezos do mes de xullo, os irmáns Noelia e Sergio Cob Álvaro participaron no Campionato de España de Freestyle que se celebrou no madrileño pavillón de Las Rozas e no que tomaron parte ao redor de 150 patinadores/as de distintos puntos da xeografía española. Nesta ocasión, Noelia Cob acadou novamente a medalla de ouro, proclamándose Campiona de España Xuvenil de Salto, e seu irmán, Sergio Cob, quedou 9º clasificado (empatado en altura dende o 5º clasificado).
Perante a súa próxima cita deportiva, Noelia Cob concentrarase coa Selección Española en Ciudad Real o vindeiro mércores 5 de setembro, un día antes de que comece a competición. Dende o Concello de Fene deséxaselle unha brillante participación no Campionato Europeo de Freestyle e moitos éxitos deportivos no futuro.