Fene ofrece máis dun centenar de propostas de ocio para disfrutar do municipio neste segundo semestre

Fene ofrece máis dun centenar de propostas de ocio para disfrutar do municipio neste segundo semestre

O Concello, a través das Concellerías de Promoción Turística e Económica, recupera “Vén a Fene”, unha completa programación de actos e actividades de lecer que se celebrará neste segundo semestre de ano en todas e cada unha das parroquias. Todas elas, máis dun centenar, están recollidas na guía presentada onte pola tarde no salón de plenos da consistorial nun acto no que tomaron a palabra o alcalde, Gumersindo Galego; o concelleiro de Promoción Turística, Juan José Franco, e Económica, César Castro, e no que participaron veciños e representantes do tecido asociativo. Precisamente, a guía –que comezou a editarse na anterior lexislatura e que tras un parón de dous anos se recupera agora- aglutina non só a programación organizada polo Concello senón que tamén recolle aquelas actividades que promoven as diferentes asociacións e entidades do municipio. O obxectivo, segundo Juan José Franco, é apoiar e potenciar todo o seu traballo, dándolle difusión.


Distribuiranse unhas 5.000 guías, tanto na Oficina Municipal de Turismo como nos establecementos hosteleiros e comercio e entidades sociais e veciñais. Entre as actividades máis novidosas, o edil avanzou a celebración do que será o primeiro homenaxe que Fene rende ó popular e querido cantante Sito Sedes, natural de Sillobre, parroquia que acollerá o acto. Nel estará a formación ó completo de Los Satélites e xa teñen confirmada tamén asistencia numerosos compañeiros do mundo do espectáculo. Tamén por primeira vez actuará no municipio, neste caso en Perlío, a reputada compañía Kukas, que traerá a obra “Encoro enmeigado” coas Fragas do Eume como protagonista. Outro veciño ilustre de Fene, o escritor Ramón Loureiro, protagonizará un dos actos destacados da programación: a presentación da súa última obra, na que Fene está moi presente. Será nun acto no que tamén se lle rendirá homenaxe.


Tras anos sen celebrarse, o Concello recupera a Romaría de Santa Ana. Será este mesmo mes en Fene, e en Maniños, porase en marcha por primeira vez a Ruta Indiana, cun percorrido teatralizado polas principais construccións impulsadas polos emigrantes alén de mar. Tamén unha ruta, pero polos muíños, se realizará no municipio e, máis concretamente, en Magalofes. A mesma parroquia acollerá unha sentida homenaxe póstuma ó párroco don Elías Seoane Ramírez. Maniños será escenario da presentación da Guía de Artes e Especies Fene Mar Vivo e, por primeira vez, Barallobre celebrará o Festival das Ondas. En canto ás actuacións musicais, festivais xa consagrados como o Festival Felicia (Felipop) en Limodre ou o Fenerock terán este ano festas de presentación especiais previas.


En definitiva, unha completa programación coa que o Concello e as entidades queren convidar a vir a Fene á cidadanía para disfrutar dun municipio cargado de propostas ata finais de ano. Por último, Juan José Franco avanzou que o departamento que dirixe xa está a traballar tamén na elaboración da próxima guía, que recollerá as actividades e eventos a celebrar durante o primeiro semestre de 2019.