Fene celebrará o Día Internacional dos Bosques plantando castiñeiros en San Valentín

Fene celebrará o Día Internacional dos Bosques plantando castiñeiros en San Valentín

24-03-2021

No acto simbólico, adiado para este xoves ás 12.00h., participarán membros de ASPANEPS e varios colectivos ambientais

O domingo 21 de marzo está marcado no calendario como o Día Internacional dos Bosques -coñecido comunmente como "Día da Árbore", co que se pretende facer unha chamada de atención sobre a importancia ambiental das árbores e, neste 2021, sobre a recuperación das masas forestais como un dos factores clave para frear o cambio climático e preservar a biodiversidade. A Concellaría de Medio Ambiente de Fene adiou para este xoves a celebración da data, que terá lugar no paseo de San Valentín a partir das 12.00h. Será un acto simbólico no que se plantarán catro castiñeiros con axuda dos membros do obradoiro ocupacional de ASPANEPS.
 
O lugar elixido para a plantación é o espazo situado ao carón da praia de San Valentín, que  leva trazas de se converter nunha pequena fraga á beira do mar e nun dos principais enclaves verdes da trama urbana fenesa.
 
Na cita participarán integrantes do obradoiro de ASPANEPS, quen colaboran habitualmente coa área municipal de Medio Ambiente en distintas actividades. Elas e eles serán os encargados de plantar os castiñeiros con axuda do persoal de Servizos dedicado ao mantemento dos xardíns. Tamén asistirán varios colectivos ambientais da zona e desde o Concello apúntase que o acto simbólico está aberto a toda a veciñanza que queira sumarse, sempre mantendo a separación interpersoal e levando a máscara respiratoria correctamente colocada. 
 
O evento encádrase na celebración do Día da Árbore, pero tamén nun paso máis para cumprir os Obxectivos de Desenvolvemento Sostible da ONU relacionados co mantemento dos ecosistemas, da calidade do aire e do ciclo da auga. 
 
Ademais, a plantación tamén forma parte da iniciativa europea #UnhaÁrborePorEuropa, na que Fene participa xunto con outros 400 municipios asumindo tres ideas principais: ampliar o arborado de maneira racional en espazos públicos, visibilizar a importancia do desenvolvemento sostible no ámbito local e involucrar a mocidade nos procesos de toma de decisións en materia de sustentabilidade local.
 
 

O Concello de Fene tamén apagará a luz co gallo da Hora do Planeta

Fene volve sumarse este sábado á iniciativa global "A Hora do Planeta" promovida pola WWF como xesto a prol da concienciación ambiental. Entre as 20.30 e as 21.30h. apagarase a iluminación pública da Casa da Cultura-Museo do Humor e tamén a da Casa do Concello. Desde a Concellaría de Medio Ambiente convídase, ademais, a que toda a veciñanza secunde a proposta apagando as luces da casa e desconectando aparellos eléctricos que non sexan imprescindibles.

A Hora do Planeta celebrarase neste 2021 de maneira virtual e por iso tamén se pide que empresas, asociacións e particulares suscriban os compromisos da WWF e que se comparta a campaña a través das redes sociais. A Hora do Planeta botou a andar en Australia no 2007 e faise coincidir co último sábado de marzo, xusto antes do cambio cara ao horario de verán. Outros anos acompañouse de encontros repartidos por todo o mundo, pero a irrupción da pandemia obrigou a suspender todas as xuntanzas e limitou a reivindicación unicamente ao apagado de espazos públicos e á difusión da súa mensaxe por medio da Rede.

Por iso neste 2021 a Hora do Planeta volverá ser principalmente virtual, mantendo a súa esencia de "movemento global para recordar que a natureza é o sistema de soporte vital do planeta, que nos brinda todo o que necesitamos, desde o aire que respiramo atá a auga que bebemos e os alimentos que comemos", tal e como indica na súa web a World Wildlife Fund engadindo que a defensa do ambiente é fundamental "para salvagardar a saúde do noso planeta e, á súa vez, a nosa propia saúde e benestar".

Ademais, a WWF destaca que 2021 será un ano trascendental para a preservación dos ecosistemas, habida conta de que en maio se celebrará en China o 15º Cumio sobre a biodiversidade, mentres que en novembro tocaralle ao Cumio sobre o Clima na cidade inglesa de Glasgow. "Serán dous momentos fundamentais para lograr un plan global ambicioso para transformar a relación da sociedade coa biodiversidade e garantir que, para 2050, se cumpra a visión compartida de vivir en harmonía coa natureza".

A Hora do Planeta está aberta á participación de todos e todas de múltiples maneiras. A primeira é apagando as luces e desconectando aparellos eléctricos entre as 20.30 e as 21.30h. deste sábado. Canda esta proposta principal -á que o Concello se sumará baixando os interruptores da iluminación da Casa da Cultura e da Casa do Concello- tamén hai a posibilidade de suscribir en liña os compromisos da organización conservacionista e compartir a campaña a través das redes sociais.

En todo o Estado xa confirmaron a súa participación 393 municipios, 121 grandes empresas e 146 organizacións. En Galicia sumáronse á iniciativa -por agora- arredor dunha vintena de concellos. Na nosa zona, ademais de Fene, tamén apagarán as luces en diversos espazos públicos os municipios de Ferrol, San Sadurniño e Moeche.