A Casa do Concello de Fene iluminarase esta noite en verde por mor da conmemoración do Día Mundial da ELA

A Casa do Concello de Fene iluminarase esta noite en verde por mor da conmemoración do Día Mundial da ELA

Atendendo ao chamamento da Asociación Galega de Afectados por Esclerose Lateral Amiotrófica (para que se iluminen neste 21 de xuño monumentos, Concellos e lugares emblemáticos de todo o territorio nacional),  dende a Concellería de Servizos Sociais de Fene acordouse o alumeado en verde do edificio situado na Praza do alcalde Ramón José Souto González.

Baixo o lema Pon #LuzporlaELA no seu Día Mundial, a campaña impulsada por Agaela Galicia pretende visibilizar a ELA, enfermidade  neurodexenerativa que afecta actualmente a 4.000 persoas en España.

A ELA é unha enfermidade neurodexenerativa incurable, progresivamente incapacitante e mortal nun prazo de 3 a 5 anos dende o seu diagnóstico. En España, cada día diagnostícanse tres novos casos de Esclerose Lateral Amiotrófica e falecen outras tres persoas "en silencio".

A isto, denuncia Agaela Galicia nun comunicado, cómpre "sumarlle que o custe medio dos coidados das persoas con ELA acada cifras moi elevadas anualmente, o que supón un problema económico inasumible para a maioría das familias". Ademais, "a dificultade de detectar os síntomas iniciais a nivel de atención primaria e a complexidade do diagnóstico diferencial demoran o diagnóstico da ELA. En España, o tempo medio dende o primeiro síntoma definitivo até o diagnóstico supera o ano".

Por iso, conclúe a asociación, "é importante potenciar a innovación e a tecnoloxía. Ao igual que é vital apoiar e fomentar a investigación, que permitirá atopar a orixe da enfermidade, o diagnóstico rápido e a cura da enfermidade".