No mes de outubro do ano 1968, Juan J. Galdo Fachal comezou a falar con algúns rapaces co fin de constituír unha sociedade cultural, recreativa e deportiva en Sillobre. No mes de novembro celébrase a primeira xuntanza no reservado de "Casa Doro", á que asisten:
- Juan J. Galdo Fachal
- Juan Puentes Allegue
- José Pereira Fernández
- José Carlos García Sixto
- Francisco Galdo Anca
- Rafael Corbalán Cernada
Neste encontro discútense as ideas de como debe ser unha sociedade, os plans de actuación e o compromiso de seguir coas xuntanzas os domingos de cada semana. En sucesivas reunións apróbanse democraticamente as diferentes propostas sobre:
- Fins da Sociedade (entre eles montar un quinteto rexional)
- Nome
- Escudo
- Estatutos (Copiados da sociedade Galicia de Caranza para evitar problemas co Goberno Civil)
- Convocatoria da asemblea veciñal para elección da Comisión Xestora
En xaneiro de 1969 convócase aos veciños da Parroquia por medio de avisos nos locais públicos para proceder á elección dunha Comisión Xestora. Faise unha exposición do proxecto a través de Juan J. Galdo Fachal; a asemblea elixe os membros democraticamente deste xeito:
- Cándido Maceiras Freire
- Francisco Rodríguez Alvariño
- Juan J. Galdo Fachal
- Rafael Corbalán Cernada
- Francisco Galdo Anca
- Fernando Saavedra Vilasuso
- Juan Ángel Maceiras García
O 19 de Abril de 1969 a xunta decide alugar un local no Souto (antiga carpintería dos Vilares) a Fernando Saavedra por 5 anos para instalar alí a Sociedade. Acórdase facer certas reparacións e máis adquirir libros e legalizar a Sociedade. Na xuntanza do 18 de xullo de 1969 fíxase a data do 3 de Agosto para a inauguración oficial do local. Xa o día 4 de Xaneiro de 1970 acórdase realizar xestións para adquisición de terreos para un campo de fútbol e máis a formación dun grupo de teatro e unha Rondalla, sendo elixido o día 18 de Xaneiro de 1970, Andrés Picallo como Director do Grupo de Teatro e Manuel Rodríguez (Lolito o rubio) e Antonio Villanueva (Tucho) como Directores da Rondalla. A actividade neste tempo é importante celebrándose, bailes, conferencias, Día das Letras Galegas, campionatos de dominó, entroidos, etc. Todo isto a pesares das reducidas dimensións lo local. O día 2 de Agosto de 1970 noméase a comisión encargada da xestión dos terreos para o novo local social formado por:
- José García Rodríguez
- Juan López Allegue
- Manuel Padín Basoa
O día 6 de xuño de 1971 acórdase a compra dos prados das Sras. Basoa para construír o novo local. O día 3 do nadal de 1971 acordase constituír o Equipo de Fútbol Agarimo S.D. O día 11 de Xuño de 1972 presentase o anteproxecto do novo local social e o 8 de xullo de 1972 acórdase arrendar un terreo en Río de Sá (O Cepiño) para que poida entrenar e xogar o equipo de fútbol. O día 1 de febreiro de 1975 créase a comisión artística de festexos no local social que se compón de catro grupos:
- Comisión Cultural
- Comisión de Torneos e Xogo
- Asesores Técnicos de Presidencia
- Asesores Técnicos de Relacións Públicas
O día 11 de xuño de 1975 faise a presentación do Grupo de Baile e o 13 de Abril de 1976 fórmase o Grupo de Gaitas. Data memorable foi o 5 de xuño de 1977, xa que se coloca a primeira pedra do Local Social e por fin chega o día máis esperado por tódolos que formamos a sociedade, este é o día 18 de Marzo de 1984: Inaugúrase o novo Local Social, no que pasan a celebrarse todas as actividades da sociedade.
