_(1800_x_505_px).jpg)
Novas
-
A exposición do XVIII Premio Luís Ksado de Creación Fotográfica xa se pode ver na Casa da Cultura de Fene
A mostra, que inclúe as coleccións gañadoras e unha selección das que se presentaron ao certame, poderá visitarse na sala de exposicións temporais do centro sociocultural fenés até o vindeiro 31 de xaneiro. Horario de visitas: de luns a venres, de 10.00 a 13.00 e de 16.00 a 21.00 horas, e os sábados, de 10.00 a 13.00 horas.
O pontevedrés Vicente Fraga Fernández foi o gañador en 2024 do certame fotográfico que convoca a Deputación da Coruña. Fraga acadou o galardón por unha colección titulada Alén, a mellor, para o xurado, das 55 que se presentaron ao concurso, un dos máis prestixiosos dos que se conceden en todo o estado. O comité avaliador -formado por Pepe Baeza Gallur, Sandra Balsells, Chema Madoz, Carmen Dalmau, Juan María Rodríguez e pola deputada de Cultura Natividad González- concedeu, ademais, unha Mención de Honra á serie Nordés, do ourensán Miguel Muñiz.
-
Avances e desafíos da Intelixencia Artificial no ciclo Contando Ciencia
A doutora en Informática pola Universidade da Coruña, Verónica Bolón Canedo, é a protagonista da primeira charla deste ano no ciclo Contando Ciencia que organiza a Biblioteca O Segrel do Penedo do IES de Fene, coa colaboración da Concellería de Ensino. A enxeñeira informática e profesora titular do Departamento de Ciencias da Computación e Tecnoloxías da Información da UDC falará este xoves, 16 de xaneiro, na Casa da Cultura de Fene sobre os “Avances e desafíos da Intelixencia Artificial”. A conferencia comezará ás 19.30 horas, con entrada libre e gratuíta até completar o aforo. Verónica Bolón Canedo é investigadora no Centro de Investigación TIC (CITIC), amais de académica de número de Academia Joven de España e académica correspondente da Real Academia de Ciencias Exactas, Físicas e Naturais de España.
-
O Concello de Fene ultima os preparativos da Cabalgata de Reis, pendente da evolución do tempo
Coma todos os anos, as Súas Maxestades Melchor, Gaspar e Baltasar visitarán Fene este domingo, a poucas horas da noite máis máxica do ano. Se o tempo o permite, a cabalgata dos Reis Magos de Oriente sairá ás 17.30 horas do CCRD de Perlío e percorrerá a Avda. Marqués de Figueroa e a Avda. Naturais ata chegar á Praza do alcalde Ramón J. Souto González (a carón da Casa do Concello) onde recibirán aos nenos e nenas que queirán conversar con eles e transmitirlles os seus desexos.
Perante as previsións de choiva e vento que se anuncian para esta fin de semana, a Concellería de Cultura agardará ate o mediodía do domingo para tomar unha decisión definitiva -da que se informará a través das redes sociais do Concello- sobre o desenvolvemento do desfile que este ano conta con 4 carrozas e un total de 32 paxes reais. O que sí se garante é a Recepción Real e unha festa infantil, baixo carpa, na Praza do Concello, entre as 18.00 e as 20.00 horas.
