Tres espectáculos cargados de maxia para as mañás da derradeira semana do ano

Tres espectáculos cargados de maxia para as mañás da derradeira semana do ano

Trala breve paréntese da fin de semana, o Concello de Fene retoma a súa programación cultural co gallo das festas do Nadal. E faino con tres propostas escénicas para público familiar coa maxia e o humor como fíos condutores. Así, este martes poderemos ver "O Profesor máxico", o mércores "A chisteira máxica" e o xoves "A Bruxiña do Nadal". As tres na Casa da Cultura, as tres a partir das 12.00h. e as tres con entrada gratuíta.

"O Profesor máxico" é o Mago Richard, un dos pioneiros do ilusionismo infantil e escolar en Galicia que, ademais, tamén é profesor de tecnoloxía. Estas dúas facetas súas xúntanse nun espectáculo con números sorprendentes, baseados todos eles en fundamentos físicos e tecnolóxicos cun resultado máxico.

Richard achéganos os segredos da ciencia a través de trucos sinxelos cos que busca espertar na rapazada e no público adulto a curiosidade e o interese polo saber científico. Poderemos velo este martes 27 de decembro a partir das 12.00h. no salón de actos da Casa da Cultura.

Ao día seguinte, o mércores tamén ás 12.00h., tocaralle a quenda ao Gran Pedrini e a súa "Chisteira máxica", da que saen todo tipo de sorpresas. Neste caso o espectáculo combina a prestidixitación, o ilusionismo, a música e o clown con variedade de números asombrosos e emocionantes. Todo levado polo camiño do humor cun toque circense e, sobre todo, participativo.

A terceira proposta da semana, "A Bruxiña do Nadal", chegará o xoves 28 sen movernos nin de hora nin de lugar. Porén aquí a maxia non será sinónimo de ilusionismo, senón do ambiente de fantasía en que vive a infancia durante estas datas. A asociación ferrolá Ti e máis Eu Teatro  propón un conto de Nadal cheo de personaxes e momentos abraiantes dos que é responsable unha bruxa rodeada de monicreques.

A peza, duns 50 minutos de duración, vai dirixida a público familiar e, en especial, para nenos e nenas de educación infaltil e primaria.