O Concello inicia nos centros educativos as charlas sobre resucitación cardiopulmonar básica e manexo do desfibrilador
27-03-2019
O concelleiro de Deportes, Xoán Manuel Bastida, explica que o calendario inaugurouse no CEIP Centieiras e que as charlas correrán a cargo dos membros da Agrupación de Voluntarios de Protección Civil
A Concellería de Deportes que dirixe Xoán Manuel Bastida vén de iniciar os cursos formativos sobre primeiros auxilios, resucitación cardiopulmonar básica (RCP) e manexo do desfibrilador nos centros educativos do municipio. Uns cursos que está a impartir a Agrupación Local de Voluntarios de Protección Civil. Ata o CEIP Centieiras se desplazaban onte Sandra Martínez e José Manuel Castro, responsable da agrupación e integrante da mesma, para iniciar o programa cos rapaces de 4º, 5º e 6º curso de Educación Primaria.
Este programa formativo busca, segundo explicou o edil Xoán Manuel Bastida, convertir a Fene nun Concello cardioprotexido. Para iso, a finais de ano, a Concellería de Deportes dotaba de desfibriladores aos pavillóns de San Valentín e do Ramo, os campos de fútbol de Perlío e Maniños e a piscina municipal, xa que na actividade deportiva son máis frecuentes os casos de morte súbita.
A morte súbita cardíaca (MSC) é un problema sanitario de primeira magnitude e estudos epidemiolóxicos realizados en España arroxaron unha taxa de mortalidade de entre 38-43 por 100.000 habitantes/ano na poboación entre 25 e 64 anos. Estímase que a cifra de mortes ao ano supera os 30.000 casos. Nesta liña, para conseguir unha maior supervivencia son fundamentais unha serie de accións que deben estar perfectamente interconectadas entre si para ser eficaces e constitúen a denominada “cadea de supervivencia”, son a RCP e a desfibrilación precoz. A Asociación Americana do Corazón suxeriu que se o 20% dos adultos estivesen adestrados nestas manobras a morbilidad e mortalidade da parada cardíaca extrahospitalaria veríase reducida significativamente. Agora ben, para poder conseguir a meta dunha desfibrilación precoz é fundamental permitir que outros individuos, non médicos, leven a cabo a desfibrilación. Neste contexto xorde o concepto de acceso público á desfibrilación.