O ciclo Contando Ciencia aborda o xoves 27 de outubro a investigación “na procura da fonte da xuventude”

O ciclo Contando Ciencia aborda o xoves 27 de outubro a investigación “na procura da fonte da xuventude”

O investigador do Sergas Manuel Collado Rodríguez é o protagonista da segunda sesión do ciclo Contando Ciencia, que organiza a Biblioteca “O Segrel do Penedo” do IES de Fene coa colaboración da Concellería de Ensino. A cita será o xoves 27 de outubro, ás 19.30 horas na Casa da Cultura de Fene, con entrada libre e de balde até completar o aforo. E o tema que abordará será o da “procura da fonte da xuventude”.

Manuel Collado Rodríguez é investigador do SERGAS no Hospital Clínico de Santiago de Compostela onde dirixe o grupo de “Senescencia celular, cancro e avellentamento”. Doutor pola UAM, realizou estadas posdoutorais no Ludwig Institute for Cancer Reseach de Londres, na NYU Medical School e no Memorial Sloan Kettering Center de New York.

Autor de numerosos artigos de investigación en revistas científicas de alto impacto, o seu labor científico desenvolveuse fundamentalmente na área do cancro e en particular en mecanismos de supresión tumoral, fundamentalmente no proceso de sencescencia tumoral. Recentemente o seu traballo trata de entender a implicación de células nai adultas en cancro e avellentamento.

Trala conferencia de Manuel Collado Rodríguez, o ciclo Contando Ciencia continuará o 17 de novembro cunha charla de José Edelstein, profesor de física teórica na USC, investigador e divulgador científico, sobre os “Buratos negros”.

Contando Ciencia é un programa que botou andar o curso pasado e que afronta agora a súa segunda edición co obxectivo de seguir achegando a ciencia á poboación en xeral.