Mañá, 1 de setembro, abre o prazo de inscrición no Espazo de encontro entre mulleres
31-08-2023
A Concellería de Igualdade do Concello de Fene, a través do Servizo Municipal de Atención á Muller, pon en marcha un novo Espazo para Mulleres enmarcado dentro do denominado Proxecto INDIRA, actividade que se ven desenvolvendo dende o ano 2018 de xeito ininterrompido cun total de dúas edicións por ano.
“Proxecto INDIRA” trátase dun espazo onde as mulleres podan experimentar, coñecerse, crecer xuntas, relaxarse e gozar. É unha proposta activa e mobilizadora da condición feminina, co obxectivo de apoiar unha transformación real na vida das mulleres, pola súa propia saúde individual e familiar.
INDIRA é un proxecto para mulleres a través de encontros semanais, no que se abordarán diferentes temas e actividades relacionados co desenvolvemento persoal e a saúde en todas as súas dimensións. Traballaremos o autocoñecemento e o autocoidado, a consciencia corporal, conectaremos a través das vivencias de cada muller participante fortalecendo a nosa consciencia como persoas de dereito e respecto. Poñeremos en práctica ferramentas que nos permitan unha mellor xestión das emocións, aumentar a sensación de comprensión, apoio e coidado de cara a empoderar as dimensións da nosa persoa: mental, física e emocional
O grupo estará guiado por dúas psicoterapeutas con ampla formación e experiencia en Igualdade, Sexualidade, Educación Emocional, Técnicas de Relaxación e Atención Plena, Traballo Corporal, Autocoñecemento e Terapia do Reencontro entre outras. A coordinación do proxecto será por parte da Psicóloga Municipal, responsable técnica do Servizo Municipal de Atención á Muller.
O proxecto vai dirixido ás mulleres de Fene e bisbarra, maiores de idade, con ganas de crecer emocionalmente, de compartir e de crear espazos de “SORORIDADE” (solidariedade entre mulleres), de empoderarse, de coñecerse e coidarse tanto mental, física como emocionalmente.
O programa desenvolverase durante o último trimestre do 2023, dende o 27 de setembro ata o 14 de decembro. Unha sesión semanal de 2 horas de duración que se realizarán os mércores de 10:00h a 12:00h da mañá no Centro Municipal de Servizos Sociais, sito na Av. do Mar, Bloque 1 – Baixo de San Valentín. (Podería modificarse o horario en función do grupo que se forme).
As mulleres interesadas poden anotarse no Servizo Municipal de Atención á Muller por teléfono ou por correo electrónico:
• 981342607 // 981492706
• smam@fene.gal
O prazo para anotarse permanecerá aberto a partir do 1 de setembro e a selección das participantes farase segundo rigoroso orde de inscrición, tendo preferencia as mulleres residentes en Fene, até completar un total de 15 mulleres. Imprescindible cubrir a folla de inscrición si se fai por email.
Actividade sen custe para as mulleres participantes.