A mostra reúne quince fotografías realizadas por mulleres vítimas de violencia de xénero que versionan obras clásicas e recoñecibles da historia da arte.
Fene acolle a exposición fotográfica “EXPRESS-ARTE: 15 VISIÓNS
A iniciativa forma parte dun programa de inserción laboral e empoderamento impulsado en colaboración coa Xunta de Galicia.
09-10-2026
O Concello de Fene, a través da Concellería de Benestar Social e Igualdade, presenta a exposición fotográfica itinerante “Express-Arte: 15 visións”. Esta mostra artística convida ao público a realizar unha viaxe crítica e reflexiva por varias das pezas máis recoñecidas da historia da arte, pero revisadas e reinterpretadas baixo un prisma puramente de xénero.
A exposición consta de quince fotografías creadas por quince mulleres que participaron nun programa de integración e inserción laboral destinado a vítimas da violencia machista. Co apoio de profesionais, as participantes incorporaron as súas propias experiencias, olladas e realidades para poñerse detrás e diante do obxectivo, transformando cadros clásicos en imaxes contemporáneas que denuncian as desigualdades e celebran o empoderamento feminino.
Inauguración e horarios de visita
A exposición estará aberta ao público de balde ata o próximo 21 de outubro no Salón de Plenos Municipal. O horario de visita será de 08:00 a 15:00 horas.
Dende o Concello de Fene convídase a toda a veciñanza, así como aos centros educativos da comarca, a achegarse a esta emocionante mostra que conxuga a sensibilidade artística coa necesaria loita pola igualdade real.
A mostra foi cedida ao Concello de Fene pola Secretaría Xeral de Igualdade da Xunta de Galicia dentro do programa de actividades que ofertan ás entidades locais adheridas á Rede de Entidades Locais contra a Violencia de xénero en colaboración coa FEGAMP.