Coa entrega dos premios Curuxa do Humor 2016, o Museo do Humor de Fene porá fin este venres ao seu “Novembro, mes do humor”. Nun acto que comezará ás 20.00h. no auditorio da Casa da Cultura de Fene, os debuxantes Alberto Cardona, Antón Lezcano, Cristian Fojón e a artista gráfica Alba Souto recibirán da man do alcalde de Fene, Juventino Trigo, e do concelleiro de Cultura, Justo Martínez Ardá, os diplomas do certame deste ano. Deseguido será Quico Cadaval quen peche o ciclo humorístico que trouxo ata Fene nas últimas semanas referentes da risa retranqueira como Carlos Blanco, Paula Carballeira ou Xan Veiga.
