Novas

11-11-2020 -
11-11-2020 -
Fene ao día

O Concello implanta o "Bica e arrinca" na Xunqueira, en Centieiras e na Jorge Juan

Persoal do departamento municipal de Servizos ultima estes días o pintado das novas áreas "Bica e arrinca" deseñadas polo Concello para mellorar a circulación e tamén a seguridade viaria diante dos colexios da Xunqueira, de Centieiras e Jorge Juan. O proxecto busca evitar as aglomeracións de primeira hora da mañá diante destes centros de ensino, facilitándolles ás nais e pais un lugar libre no que parar o tempo xusto e necesario para deixar a rapazada sen necesidade de estacionar nin tampouco de ocupar parte da calzada aparcando en dobre fila. A Concellaría de Seguridade, promotora da iniciativa, agarda que este novo xeito de regular o tráfico faga máis cómodo levar os nenos e nenas á escola e, neste sentido, pídelle ás familias a máxima colaboración para que dea resultados desde xa mesmo.
Ver máis
11-11-2020 -
11-11-2020 -
Fene ao día

O Concello e ADIF avanzan na posible mellora da seguridade na liña férrea a seu paso polo municipio

O Concello de Fene e o Administrador de Infraestruturas Ferroviarias (ADIF) acordaron hoxe abordar a mellora da seguridade na liña férrea ao seu paso polo municipio. Asi o determinaron nunha reunión telemática promovida pola Subdelegación do Goberno na Coruña, que desta maneira atendeu a petición feita neste sentido polo alcalde de Fene, Juventino Trigo. No encontro abordouse a necesidade de retomar o convenio de colaboración suscrito en 2010 polo Concello e ADIF para a construción e mantemento do cerramento e cruces peonís da vía a distinto nivel da liña ferroviaria Betanzos-Ferrol ao seu paso por Fene, toda vez que aquel acordo perdeu a súa vixencia.
Ver máis
10-11-2020 -
10-11-2020 -
Fene ao día

Fene, Ares, Cabanas, Mugardos e Neda promoven o programa dual Reinicia VII para persoas desempregadas

Os concellos de Fene, Ares, Cabanas, Mugardos e Neda -quen xa colaboran no proxecto de inserción laboral Inicia V- van poñer en marcha a partir do 15 de decembro unha nova edición do obradoiro de emprego Reinicia, que vai xa pola súa sétima edición. O programa vai dirixido a persoas desempregadas maiores de 18 anos co obxectivo de mellorar a súa capacitación profesional e, en consecuencia, incrementar as posibilidades de acceso ao mercado laboral. Ofértanse 20 prazas, repartidas a partes iguais entre as dúas accións formativas que se van impartir, unha centrada na atención sociosanitaria a dependentes e outra sobre traballos de carpintaría e moble. Para ampliar información pode contactarse coa Área de Formación e Emprego "Pancho Allegue" a través do teléfono 981 492 767 ou do correo orientacion.laboral@fene.gal.
Ver máis
10-11-2020 -
10-11-2020 -
Benestar e igualdade

Subvencións ás familias para a adquisición dos agasallos de Reis

O Concello vén de convocar as subvencións dirixidas ás familias para a adquisición de agasallos para a festividade de Reis.
A publicación do anuncio da convocatoria no Boletín Oficial da Provincia do 10 de novembro establece a apertura do prazo de presentación de solicitudes dende mañá, e por un prazo de 10 días naturais.
Van dirixidas ás familias con nenos e nenas nados/as haxan nados/as no ano 2004 e posteriores, ou maiores desta idade e nados/as no ano 2002 e posteriores sempre que teñan o recoñecemento oficial de minusvalía ou grao de discapacidade.
Coas subvencións cubriranse os gastos derivados da adquisición de agasallos para a festividade de Reis, a saber: xoguetes, xogos, libros, material didáctico e outros obsequios que correspondan coa idade do ou da menor a quen vai dirixida a axuda, sempre que estes sexan adquiridos no período comprendido entre o día de apertura da presente convocatoria e o día 6 de xaneiro de 2021.
Con carácter xeral poderase xustificar a subvención con gasto relativo á adquisición de roupa, calzado ou material deportivo sempre que o importe total do gasto realizado non supere o 75% da axuda concedida.
 
Ver máis
09-11-2020 -
09-11-2020 -
Cultura

Aprázase o concerto de Sés previsto para este sábado

Logo das últimas medidas adoptadas pola Xunta de Galicia (DOG núm. 223, do 04.11.20) para facer fronte á Covid 19, o Goberno Municipal de Fene acordou adiar para o vindeiro mes de marzo o concerto de Sés que ía ter lugar este sábado, 14 de novembro, na Praza do alcalde Ramón José Souto González.

Aínda que até o último momento barallouse a posibilidade de mantelo na data prevista, “xa que estabamos en condicións de garantir un concerto seguro” e a Dirección Xeral de Saúde autorizara ao aumento do aforo até as 146 persoas, finalmente o goberno municipal decidiu aprazalo “á agarda de que a situación sanitaria permita converter o
concerto nunha festa á que se achegue moita máis xente de Fene e da bisbarra e contribúa a dinamizar o tecido económico do Concello”.
Ver máis
09-11-2020 -
09-11-2020 -
Fene ao día

O Concello de Fene e a Deputación destinan cerca de 170.000 euros a colaborar na recuperación económica de autónomos e microempresas

Fene dedicará 169.808,57 € a colaborar coas microempresas e persoas autónomas que se viron afectadas pola declaración do primeiro Estado de Alarma, xa fose por ter que pechar nese período, por terse acollido a ERTEs ou porque a súa facturación se vise reducida en máis dun 75%. Dependendo dos casos poderán obter axudas de ata 1.500 ou 3.000 euros para sufragar gastos de adaptación ás novas esixencias preventivas e para compensar outros gastos xerais, como poden ser as subministracións de electricidade, luz e auga ou mesmo canons e alugueiros que deberon soportar a pesar da crise sanitaria. O prazo de solicitude -que se fará obrigatoriamente a través da Sede Electrónica- permanecerá aberto até as 14.00h. do día 25 de novembro.

Segundo as liñas xerais do programa, as subvencións estarán entre os 1.500 euros como máximo para autónomos e autónomas sen persoal ao seu cargo e os 3.000 euros de tope aos que poderán optar as microempresas e persoas autónomas que teñan persoas empregadas. Neste último suposto hai tres tramos de axuda: 2.000 euros cunha persoas empregada, 2.500 se o número de traballadoras/es se sitúa entre 2 e 5 e, por último, 3.000 euros se o cadro de persoal está entre 6 e 9 persoas contratadas.
Ver máis
06-11-2020 -
06-11-2020 -
Fene ao día

Fene consegue dúas Flores de Honra no certame anual Vilas en flor

O Concello de Fene estreouse con nota en Vilas en flor, o proxecto coordinado en Galicia pola Fundación Juana de Vega no que se recoñecen as políticas de posta en valor de espazos públicos urbanos por medio de flor e planta coa finalidade de mellorar a calidade de vida da poboación, así como as accións de difusión e concienciación veciñal arredor da sostenibilidade ambiental.  O xurado do certame outorgoulle ao noso municipio un total de dúas Flores de Honra -o máximo son cinco, que ninguén obtivo até o momento-, valorando especialmente o coidado das ribeiras do Cádavo e o feito de que se manteña "adecuadamente" unha extensa rede de parques repartidos por todo o territorio.

Fene participou neste 2020 por primeira vez nesta iniciativa promovida en conxuntamente por ASVINOR -Asociación de viveiristas do Noroeste-, AGAEXAR -a asociación maioritaria no sector da xardinaría galega- e a Fundación Juana de Vega, co obxectivo de promover a protección, mellora e posta en valor dos espazos verdes nos municipios galegos e contribuir con iso á calidade de vida da súa poboación.
Ver máis
05-11-2020 -
05-11-2020 -
Fene ao día

Publicadas as novas restriccións en toda Galicia e que, ademais, significarán novas medidas para o concello de Fene

A Xunta publicou unha orde e máis un decreto que incrementan desde hoxe  mesmo as restricións en toda Galicia e que, ademais, significarán novas medidas para o concello de Fene e o resto de municipios da ría a partir a medianoite do venres ao sábado (ata daquela seguen en vigor as ditadas hai uns días).

Desde o Concello pídeselle á veciñanza que se extremen as precaucións en canto a distanciamento interpersoal, hixiene de mans e respiratoria, ao tempo que se apela á responsabilidade individual para o cumprimento rigoroso das normas en vigor.
Ver máis
05-11-2020 -
05-11-2020 -
Benestar e igualdade

Afal Ferrolterra pon en marcha unha campaña de captación de fondos

Baixo o lema # Afalcuentaconmigo, a Asociación de Familiares de Enfermos de Alzheimer presenta o seu primeiro reto solidario, unha campaña de captación de fondos que se destinarán ao sostemento da asociación, dos seus centros de día e recursos terapéuticos nuns momentos nos que, segundo os responsables da entidade, “a actual situación de pandemia por Covid-19 trouxo consigo unha serie de problemas económicos aos que a nosa asociación é especialmente sensible”.

As doazóns canalízanse a través da plataforma de micromecenazgo Migranodearena. org e poderán realizarse durante todo o mes de novembro. As persoas que queiran colaborar deberán entrar na web ( https://www.migranodearena.org/reto/-afalcuentaconmigo) e seleccionar o importe que desexan doar á asociación.
Ver máis
05-11-2020 -
05-11-2020 -
Cultura

A Biblioteca Municipal de Fene súmase á conmemoración do mes da ciencia en galego

Trala exposición adicada a Carvalho Calero, a biblioteca municipal de Fene abre hoxe
unha pequena mostra bibliográfica de contido científico, dirixida a lectores/as de todas as idades. A iniciativa encádrase na conmemoración do “Mes da Ciencia en Galego nas Bibliotecas” que promove a Consellería de Cultura entre os centros da rede pública. O obxectivo é “sensibilizar aos máis novos sobre a necesidade de empregar o galego na literatura científica”.

A exposición “Mes da ciencia” inclúe unha selección de títulos para todos os públicos e idades como “Po de estrelas”, “Un ronsel de Ardora”, “As vidas de Galileo” ou “O valor das ideas” (no campo de literatura infantil e xuvenil); “Miscelánea Zoolóxica”, “Cando as estrelas caen do ceo”, “Suma da lóxica” ou “Verbo da teoría da relatividade” (para adultos). A mostra permanecerá aberta até o 30 de novembro no horario habitual da biblioteca: de luns a venres, de 16 a 21 horas, e os sábados, de 10 a 13 horas. Os domingos e festivos estará pechada.
Ver máis
1 2 ...99 100 101102 103 ...315 316 >>