Novas

05-08-2022 -

A Deputación da Coruña e o Concello asinan o convenio para a compra de dous inmobles en Naturais de Fene que acollerán varios servizos municipais

O vicepresidente da Deputación da Coruña, Xosé Regueira, e o alcalde de Fene, Juventino Trigo, subscribiron esta mañá o convenio nominativo para financiar a adquisición por parte do Concello dun baixo e un entresollado situados na confluencia do Camiño da Casa Nova con Naturais de Fene. Trátase dunha construción triangular cuxa parte inferior, de 809 m2, se ten previsto dedicar a estacionamento de vehículos municipais, mentres que a superior -de 883 m- se acondicionará para acoller varios servizos, aliviando deste modo os problemas de espazo que padece neste momento a Administración local. O importe da compra acordado cos propietarios xa o ano pasado ascende a 310.000 euros máis IVE, dos que a Deputación achegará 248.000 -o 80%-, mentres que o Concello de Fene porá con recursos propios o 20% restante, ademais dos custes rexistrais e do valor engadido.
03-08-2022 -

O Goberno local de Fene propón dárlle ao Museo do Humor o nome de Xaquín Marín

Poucas persoas hai en Fene, de nacemento ou adopción, que conciten tanto afecto xeral como Xaquín Marín Formoso. E motivos sobran. Creador polifacético, dinamizador cultural, reivindicador e un dos máximos expoñentes do humorismo retranqueiro galego posto ao servizo da crítica social. Son moitos os méritos que, sen el pretendelo, se xuntan nun home xa de por si afable e sempre conciliador. Un bo e xeneroso, vaia, que hai case 40 anos teimou en crear o primeiro museo do mundo dedicado ao humor. Fene recoñeceulle durante maio e xuño todo o seu labor a prol do municipio e da Cultura por medio do programa "Volta á orixe", que contou con centos de asistentes á exposición monográfica e ás actividades paralelas. Agora, como culminación deste merecido tributo, o pleno municipal votará na mañá deste xoves o cambio de denominación do Museo do Humor para que pase chamarse "Museo do Humor de Fene: Xaquín Marín".
02-08-2022 -

Fene participa no proxecto Reinicia IX

O Concello de Fene, xunto cos de Ares, Mugardos, e Cabanas, impartirá entre o 19 de setembro de 2022 e 18 de setembro de 2023 dúas especialidades do obradoiro mixto de emprego e formación Reinicia IX, subvencionado pola Consellería de Emprego e Igualdade. O programa inclúe 20 prazas e vai dirixido a persoas desempregadas maiores de 18 anos que poderán formarse nalgunha das dúas especialidades formativo ocupacionais previstas: atención sociosanitaria a persoas dependentes en institucións sociais (curso de nivel 2 que require estudos de ESO ou equivalente. 10 prazas) ou  traballos de carpintería e moble, aplicación de vernices e lacas en elementos de carpintería e moble (curso de nivel 1 que require estudos primarios. 10 prazas).
29-07-2022 -

O parque da Hortiña mostra a súa mellor cara para acoller o Felicia Pop 2022

De hoxe en dúas semanas xustas, Limodre iniciará dous días dedicados á mellor música coa celebración do Felicia Pop 2022. A edición deste ano, xa sen restricións pandémicas, ten preparado un completo programa para o venres 12 e o sábado 13 de agosto no que pasarán polo escenario Los Eternos, Los Malinches, More Kicks, The Rezillos, Tesouro, Rockers go to Hell, Pelazo, The Phantom Keys, Terbutalina e Los Pepes, rematando ambos días con picadiscos. As entradas están á venda desde hai días... e tamén está listo o espazo principal do festival, o parque da Hortiña, ao que o Concello de Fene -que tamén colabora co programa- acaba de facerlle un completo lavado de cara cun investimento de 21.190 euros.
26-07-2022 -

Abre o prazo para que os establecementos de Fene se apunten ao vindeiro Outlet

O Concello de Fene organiza un novo Outlet, coa finalidade de que os comercios, a hostaleria e as empresas de servizos de Fene promocionen os seus produtos, e así fomentar o consumo no comercio local. Será os días 2, 3 e 4 de setembro de 2022 (venres e sábado, de 10 a 14 h e de 16:30 a 20:30 horas e o domingo, de 10 a 14 horas) nos propios establecementos. Segundo informan dende a Concellería de Promoción Económica, os establecementos interesados en participar deberán enviar un correo electrónico a desenvolvemento.local@fene.gal, indicando o nome do establecemento, o nome da persoa responsable, un número de teléfono, o enderezo electrónico e se precisa mesa e haima. A data límite para comunicar o seu interese é o xoves 28 de xullo.
23-07-2022 -

Declaración institucional, ofrenda floral e himno galego para conmemorar o Día da Patria Galega

Apelando aos sucesos do 10 de marzo de 1972 e á loita polas liberdades, a escritora Ánxela Loureiro foi a encargada de ler este mediodía a declaración institucional do Concello de Fene para conmemorar o 25 de xullo, Día da Patria Galega. No acto, que se desenvolveu a carón do Monumento Día da Patria Galega, no parque liñal do río Cádavo, Loureiro estivo arroupada polo alcalde de Fene, Juventino Trigo, polo concelleiro de Cultura, Justo Ardá, membros da corporación municipal e veciños/as de Fene. O acto finalizou cunha ofrenda floral e coa interpretación do himno galego por parte dos presentes. Ademais, entregouse á autora da declaración institucional unha praca conmemorativa, realizada pola ceramista fenesa Carme Romero, e a carpeta da exposicion “Volta á orixe”, con reproduccións de debuxos de Xaquín Marín.
21-07-2022 -

Inicio das contratacións da Risga

O Concello de Fene, a través da Concellería de Emprego e Formación, puxo en marcha o mércores 20 de xullo o programa de emprego correspondente á Renda de Integración Social de Galicia. A través deste programa, financiado pola Consellería de Emprego e Igualdade e polo Concello de Fene, procedeuse á contratación de dúas persoas -ao 75% da xornada e cunha duración de 9 meses- para a realización de traballos de limpeza viaria.
21-07-2022 -

Bando do Día da Patria Galega 2022

Perante a proximidade do 25 de xullo, Día da Patria Galega, o alcalde de Fene, Juventino Trigo, vén de publicar un bando municipal no que lembra que nesta xornada "homenaxeamos aos nosos devanceiros, a quen nos precederon na loita polas liberdades democráticas e o autogoberno, nomeadamente a Daniel e a Amador e a todas aquelas persoas que hai 50 anos, no de 10 de marzo de 1972, saíron á rúa para defenderen os seus dereitos laborais e protagonizar un dos fitos máis importantes na historia do movemento obreiro galego".
19-07-2022 -

O Concello inviste máis de 51.000 euros na renovación dos parques infantís de Limodre e Sillobre

A empresa Jardinería Arce rematou hai uns días os dous proxectos de rehabilitación dos parques infantís de Limodre e do Souto, en Sillobre, como adxudicataria dun contrato no que o Concello de Fene investiu 51.694,55 euros. As áreas de xogos para a rapazada -en ambos casos situadas ao pé de bloques de vivendas- están xa abertas ao público tras varias semanas de traballo en que se substituíu o chan e se instalaron novos equipamentos lúdicos, co obxectivo principal de facelas máis accesibles, seguras e adaptadas á normativa.
18-07-2022 -

Ruxe-Ruxe e Boyanka-Kostova na recta final do ciclo Xullo, Mes de Patria

Coa lectura da declaración institucional do Día da Patria Galega, a cargo da escritora Ánxela Loureiro, concluirá o vindeiro sábado o programa que organiza a Concellería de Cultura para conmemorar a festividade do 25 de xullo. O acto terá lugar ás 13 horas no parque liñal do Río Cádavo, a carón do Monumento Día da Patria Galega. Previamente, tamén esta semana, haberá dous concertos na praza do alcalde Ramón José Souto González, ámbolos dous con entrada libre e de balde. O xoves 21 de xullo, ás 21.00 horas, actuará Ruxe-Ruxe co espectáculo Xira 2022 (Rede Cultural) e o venres 22, á mesma hora, será Boyanka-Kostova (Rede Cultural) quen suba ao escenario instalado a carón da Casa do Concello de Fene.