Novas

03-03-2026 -
03-03-2026 -
Fene ao día

A presentación de “Mulleres da Reconversión” centra a programación do 8M en Fene

O Concello de Fene sitúa a presentación do proxecto e documental “Mulleres da Reconversión”, impulsado pola Deputación da Coruña, como eixo central da programación do 8 de Marzo, Día Internacional da Muller. O acto terá lugar o venres 6 de marzo, ás 18.00 horas, na Casa da Cultura, e converterase nun espazo de recoñecemento público ás mulleres que participaron nesta iniciativa de recuperación da memoria colectiva.

A presentación contará coa presenza das protagonistas do proxecto, así como da deputada de Igualdade da Deputación da Coruña, Sol Agra; do director do proxecto, Iago Varela; da presidenta de Navantia, Carla Chawla; e da alcaldesa de Fene, Sandra Permuy.

O acto servirá para visibilizar e homenaxear ás mulleres que viviron en primeira persoa o proceso de reconversión industrial, poñendo en valor o seu papel, moitas veces silenciado, nun momento clave da historia social e económica do concello.
Ver máis
02-03-2026 -
02-03-2026 -
Cultura

Sobes ao autobús do teatro?

O Centro Dramático Galego pon a disposición do Concello de Fene 17 prazas de autobús para asistir a unha representación da obra Hamlet no Salón Teatro de Santiago. A cita para os/as veciños/as do noso concello será o venres 27 de marzo, con saída ás 15.45 horas da Avda. do Concello e retorno aproximado sobre as 20.15/20.30 horas. O comezo da función está previsto para as 18.00 horas e o prezo da entrada ascende a 5 euros (autobús de balde).
As persoas interesadas poderán reservar a praza ata o día 23 de marzo enviando un correo electrónico a cultura.deportes@fene.gal ou no teléfono 981 340 366, indicando nome, apelidos e número de teléfono de contacto.
Ver máis
27-02-2026 -
27-02-2026 -
Fene ao día

Abre o prazo de inscrición para o XVI Concurso de Tapas de Fene, que se celebrará do 10 ao 19 de abril

O Concello de Fene vén de abrir o prazo de inscrición para participar no XVI Concurso de Tapas, que se desenvolverá entre os días 10 e 19 de abril, coa participación dos establecementos hostaleiros do municipio que queiran sumarse a esta iniciativa de promoción gastronómica e dinamización económica.
Os locais interesados poderán presentar as súas propostas ata o vindeiro 13 de marzo, ben a través do rexistro xeral do Concello de Fene ou da sede electrónica no caso de persoas físicas, ou exclusivamente a través da sede electrónica no caso de persoas xurídicas. Ademais, será obrigatorio o envío dunha fotografía da tapa durante o período de inscrición ao enderezo electrónico desenvolvemento.local@fene.gal.
Ver máis
26-02-2026 -
26-02-2026 -
Fene ao día

O Concello de Fene executa traballos de mantemento en camiños municipais e prepara novas actuacións na rede secundaria

O Concello de Fene está a levar a cabo esta semana distintos traballos de mantemento e acondicionamento en camiños municipais, no marco das actuacións habituais de conservación da rede viaria secundaria do municipio.
Parte desta rede presenta un grao de deterioro de diversa consideración, motivado principalmente polo paso do tempo, o tráfico intenso e as adversas condicións climatolóxicas, especialmente tras os prolongados episodios de mal tempo rexistrados nas últimas semanas. Neste contexto, ao longo destes días executáronse actuacións de mellora do firme en varios camiños do termo municipal.
Os traballos realizados consistiron en rozas e limpeza superficial previa, o perfilado e regularización do terreo mediante maquinaria mixta, así como a achega de zahorra artificial nas zonas máis deterioradas. Posteriormente procedeuse ao estendido, nivelado e compactado do material, co obxectivo de garantir unha correcta estabilidade do firme e unha mellor drenaxe.
As actuacións xa executadas corresponderon aos camiños de Buios e Rañoa (Sillobre), Rego da Moa (Barallobre) e Casal (Magalofes). Na actualidade os traballos continúan nos camiños de Tellerías (San Valentín) e outros na parroquia de Fene.
Ver máis
23-02-2026 -
23-02-2026 -
Cultura

Día de Rosalía 2026

Coincidindo coa data de nacemento da célebre poetisa galega, neste luns 23 de febreiro conmemórase o Día de Rosalía, celebración promovida por entidades como a Asociación de Escritoras e Escritores en Lingua Galega ou a Fundación Rosalía de Castro co obxectivo de dar a coñecer e ensalzar a obra da autora de Follas Novas e Cantares Gallegos. Con este mesmo fin, o Concello de Fene organiza na Casa da Cultura este mércores, 25 de febreiro, ás 19.30 horas, o acto “Coñecer a Rosalía”, aberto a todos os públicos con entrada libre e de balde até completar o aforo.
“Coñecer a Rosalía” incluirá un recital popular de poesía, a cargo do Club de Lectura da Biblioteca Municipal de Fene, unha conferencia a cargo do catedrático especialista en Rosalía de Castro, Francisco Rodríguez, e coloquio sobre a obra rosaliana.
Ver máis
20-02-2026 -
20-02-2026 -
Museo do Humor Xaquín Marín

O Concello de Fene abre o prazo para participar no XXX Concurso de Humor Gráfico e Caricatura “Curuxa do Humor”

Trala publicación do extracto das bases no Boletín Oficial da Provincia núm. 34, do venres 20 de febreiro de 2026, o Concello de Fene informa da apertura do prazo para presentar obras a unha nova edición dos “Premios Curuxa” do Museo do Humor Xaquín Marín. As persoas interesadas en participar poderán enviar ou presentar os seus debuxos no Rexistro Xeral municipal até o vindeiro 31 de maio. Como novidade, o concurso vai dirixido este ano a artistas residentes na Península Ibérica (España e Portugal), ampliando o seu ámbito xeográfico xa que, até o de agora, podían participar no certame unicamente persoas residentes no estado español.
Novamente, nesta edición haberá tres categorías: Curuxa, para maiores de 25 anos; Curuxa Nova, para persoas con idades comprendidas entre os 16 e os 25 anos; e Caricatura, na que poderán participar debuxantes a partir dos 16 anos. E mantense a exclusión de obras realizadas total ou parcialmente con intelixencia artificial, estipulándose que calquera obra creada coa axuda da IA “quedará automáticamente excluida do certame. As obras deberán ser de creación manual ou dixital directa por parte do/da artista”.
Ver máis
19-02-2026 -
19-02-2026 -
Fene ao día

A falta de conservación na Estrada do Peirao, en Maniños, e na AC-133 provoca problemas de seguridade e dificulta actuacións básicas como a reparación do alumeado

O Concello de Fene reclámalle á Xunta de Galicia actuar de maneira inmediata no mantemento das estradas de competencia autonómica ao seu paso polo termo municipal, ante a situación de deterioro que presentan varios treitos que están a xerar problemas de seguridade para a veciñanza.
O goberno local fixo especial fincapé no estado da Estrada do Peirao, en Maniños, onde se rexistran fochancas de grandes dimensións e treitos en diferentes alturas, que supoñen un risco tanto para os vehículos como para os peóns. Do mesmo xeito, sinala a falta de mantemento na AC-133, onde a ausencia de limpeza da vexetación nas marxes de afección de competencia autonómica está a impedir mesmo a realización de traballos básicos, como a reparación do alumeado público.
Estas cuestións foron abordadas nun encontro mantido esta semana entre a alcaldesa de Fene, Sandra Permuy, o primeiro tenente de alcaldesa, Manuel Polo, e o deputado do BNG no Parlamento de Galicia, Mon Fernández, no marco dunha visita institucional ao concello.
Ver máis
18-02-2026 -
18-02-2026 -
Cultura

Fene suspende o desfile de comparsas pero mantén o festival baixo carpa a carón da Casa do Concello

Perante as adversas condición meteorolóxicas previstas para as vindeiras horas (alerta amarela por vento e choiva e alerta laranxa por posible desbordamento do río Cádavo, en Perlío), o Goberno Municipal de Fene acordou suspender o desfile de comparsas que ía percorrer esta tarde as rúas do concello. Mantense, nembargantes, o festival e a lectura do Testamento do Entroido, na praza do alcalde Ramón Jose Souto González (baixo carpa). As comparsas concentraranse na praza, a carón da Casa do Concello, ás 18.30 horas, e subirán ao palco por orde, segundo o listado publicado previamente na web municipal.
Rematado o certame, darase paso á queima do Meco e ao espectáculo pirotécnico (sempre que as condición meteorolóxicas o permitan).
Ver máis
17-02-2026 -
17-02-2026 -
Fene ao día

A obstrución dun rexistro polo desprazamento do toro dunha árbore provocou un desbordamento puntual do río Cádavo na rúa San Estevo

O Concello de Fene informa de que na xornada de onte produciuse un pequeno desbordamento puntual do río Cádavo na contorna da rúa San Estevo, causado pola obstrución dun rexistro ao quedar atravesado o toro dunha árbore arrastrado polo elevado caudal do río.

A acumulación dese toro impediu o correcto paso da auga, provocando unha saída puntual da mesma. Ante a imposibilidade de retirar o obstáculo de maneira manual, valorouse e executouse a apertura dun pequeno treito do aglomerado, actuación que permitiu liberar o rexistro e restablecer con rapidez o funcionamento normal da canle. A intervención resultou efectiva e evitou que a situación tivese maiores consecuencias.

Desde o Concello indícase que se estudará a posibilidade de instalar un rexistro de maior tamaño nese punto concreto, co obxectivo de minimizar o risco de incidencias semellantes no futuro en episodios de fortes choivas.
Ver máis
16-02-2026 -
16-02-2026 -
Cultura

Catorce comparsas participarán o mércores no desfile do Entroido de Fene

A concentración das comparsas terá lugar ás 17.45 horas nas rúas San Salvador e Tarrrío de Perlío. A hora de saída será ás 18.00 horas, percorrendo a Marqués de Figueroa, a rúa da Fraga e rematando na Praza do alcalde Ramón J. Souto González co desfile e actuación das comparsas, a lectura do Testamento, a queima do Entroido e o espectáculo pirotécnico.

No caso de anular o desfile por mal tempo (publicarase no web e redes sociais o mércores 18 ao mediodía), a concentración das comparsas terá lugar ás 18.30 horas (por orde, segundo o listado) na Praza do alcalde Ramón J. Souto González, manténdose a dita actuación, a lectura do Testamento, a queima do Entroido e o espectáculo pirotécnico.

No caso de previsións meteorolóxicas adversas, con alertas indicadas pola Xunta de Galicia (AEMET), dende o Departamento de Cultura do concello indican  que se tomarán as medidas preventivas necesarias.
Ver máis
1234567...132 133 >>