Novas

19-10-2022 -

O Concello de Fene mellorará as comunicacións con Vilar do Colo desde Barallobre e Maniños

O Concello de Fene adxudicou recentemente en 112.410 euros as obras de mellora dos accesos ao Vilar do Colo desde o cemiterio municipal e desde a estrada dos Casais. Dúas vías secundarias moi utilizadas por persoas traballadoras e tamén por veciñanza en xeral que acode aos distintos servizos dispoñibles no polígono. De feito, o proxecto adxudicado a Canarga Construcciones S.L. prevé mellorar a seguridade nun tramo da Rúa das Áncoras e, en colaboración co Concello de Cabanas, tamén a rotonda de acceso á vía rápida VG-1.2 e á AP-9.
17-10-2022 -

O ciclo Contando Ciencia aborda o xoves 27 de outubro a investigación “na procura da fonte da xuventude”

O investigador do Sergas Manuel Collado Rodríguez é o protagonista da segunda sesión do ciclo Contando Ciencia, que organiza a Biblioteca “O Segrel do Penedo” do IES de Fene coa colaboración da Concellería de Ensino. A cita será o xoves 27 de outubro, ás 19.30 horas na Casa da Cultura de Fene, con entrada libre e de balde até completar o aforo. E o tema que abordará será o da “procura da fonte da xuventude”.
13-10-2022 -

A cuarta “Andaina por Fene” percorrerá a parroquia de Magalofes o sábado 22 de outubro

Xa está aberto o prazo para apuntarse na ruta por Magalofes que organizan a Concellería de Deportes e a AVV Magalofes para o sábado 22 de outubro, a partir das 11.00 horas (agrupamento ás 10.45 horas). A andaina comezará no local da entidade para continuar por Picas, Punxeiro, Fontenova, Muíño do Redondo e Igrexa, e volta ao punto de saída tras percorrer uns 5 quilómetros de dificultade baixa e cunha duración aproximada de 2 horas. A participación é de balde, pero cómpre anotarse (antes do venres 21 de outubro ás 13.30 horas) no teléfono 630 994 459.
13-10-2022 -

Escolas culturais de música que entran en funcionamento no curso 2022-23

A Concellería de Cultura informa que, en base á matriculación rexistrada, as Escolas Culturais de Música que entrarán en funcionamento no curso 2022-2023 son: piano-solfexo e guitarra (iniciación). O alumnado de piano-solfexo comezarán as aulas a partir do luns, 17 de outubro, no día e hora que se lle asignou ao efectuar a matriculación e que poden comprobar no cadro que figura ao pé desta nova. As aulas impartiranse na Casa da Cultura e Escola da Fonte do Campo. O alumnado de guitarra (iniciación) comeza as aulas o martes, 18 de outubro, ás 16:30 h na Casa da Cultura
11-10-2022 -

Entidades culturais, educativas e deportivas poden solicitar as axudas para as actividades organizadas en 2022

Coa publicación do extracto da convocatoria no BOP, o Concello de Fene abre este xoves o prazo de solicitude de subvencións, en réxime de concorrencia competitiva, a entidades sen fins de lucro para o ano 2022. O obxectivo da convocatoria é “apoiar ás entidades municipais sen ánimo de lucro no desenvolvemento de actividades culturais, deportivas e educativas que favorezan a participación entre a veciñanza”, amais de contribuír ao financiamento dos gastos de funcionamento das mesmas. As sociedades culturais, deportivas ou Anpas interesadas en acollerse á convocatoria, deberán presentar as súas solicitudes no Rexistro Xeral do Concello, sede electrónica, até as 14:00 h do vindeiro 26 de outubro.
11-10-2022 -

A segunda temporada de Rapa tamén chega a San Valentín

A produtora Portocabo tamén elixiu localizacións en Fene para a segunda temporada da serie "Rapa", de Movistar+, protagonizada por Javier Cámara e Mónica López. Aínda que a maioría das filmacións se están desenvolvendo na cidade de Ferrol e nas instalacións do Arsenal, dúas das escenas van gravarse durante este mércores na contorna do paseo marítimo de San Valentín. Por este motivo, a partir das 20:00h de hoxe martes e ata aproximadamente as 21:00h de mañá  estará prohibido aparcar diante do CPI A Xunqueira e da pista polideportiva de San Valentín. Ademais, entre as 14:00 e as 21:00h de mañá, festivo estatal, tamén permanecerá cortado ao tráfico o tramo da avenida comprendido entre o antigo Mercadona e o parque da Xunqueira. Neste sentido, a entrada e saída do barrio deberá facerse por itinerarios alternativos que estarán debidamente sinalizados pola Policía Local.
10-10-2022 -

Ampliación de horarios e servizo especial de transporte ao cemiterio municipal no Día de Todos os Santos e Día de Defuntos

Con motivo do Día de Todos os Santos e o Día de Defuntos, o Concello de Fene informa da ampliación de horarios do cemiterio municipal, así como da posta en marcha dun servizo de transporte especial.
 
Isto é, os día 1 e 2 de novembro o cemiterio permanecerá aberto ao público ao mediodia de maneira ininterrompida.
O horario nas instalacións municipais será, para o 1 de novembro, de 8 a 22 horas, e o 2 de novembro, de 10 a 20 horas.
Infórmase que o día 1 de novembro ás 17.00 h oficiarase unha misa.
Por outra banda, o servizo de transporte especial realizarase conforme ás seguintes datas e horarios:
31 de outubro, en horario de tarde
1 de novembro, e o  mércores día 2, horario de mañá e de tarde.
No horario de mañá, a saída está prevista do cuartel da Garda Civil ás 10 horas e o regreso estímase ás 12 horas. No horario de tarde, a saída, do mesmo punto, será ás 16 horas e o regreso ás 18 horas. Námbolos dous casos, o autobús realizará o percorrido e paradas habituais. 
10-10-2022 -

21 familias participan no programa "Educando en familia"

Esta semana botou a andar o programa "Educando en familia" organizado pola Concellaría de Servizos Sociais de Fene. A través de encontros semanais guiados pola terapeuta Virginia Castro, as 21 familias participantes terán a oportunidade de aprender de aquí a xuño distintas técnicas relacionadas coa xestión de conflitos e a educación emocional, pero tamén recomendacións sobre pautas e límites que se deben marcar no núcleo familiar co obxectivo de establecer relacións de confianza que favorezan o correcto desenvolvemento durante a etapa infantil e a adolescencia.

Servizos Sociais dividiu a actividade en dous grupos, un os martes de 16:30 a 18:00h e outro os venres entre as 9:30 e as 11:00h., coa finalidade de que as persoas participantes puidesen conciliar a asistencia co traballo ou outras obrigas.
10-10-2022 -

21 familias participan no programa "Educando en familia"

Esta semana botou a andar o programa "Educando en familia" organizado pola Concellaría de Servizos Sociais de Fene. A través de encontros semanais guiados pola terapeuta Virginia Castro, as 21 familias participantes terán a oportunidade de aprender de aquí a xuño distintas técnicas relacionadas coa xestión de conflitos e a educación emocional, pero tamén recomendacións sobre pautas e límites que se deben marcar no núcleo familiar co obxectivo de establecer relacións de confianza que favorezan o correcto desenvolvemento durante a etapa infantil e a adolescencia.
07-10-2022 -

O paseo marítimo de San Valentín acolleu esta mañá o obradoiro de debuxo urbano People and Planet

Alumnado de 2 de bacharelato do IES de Fene participou na xornada de hoxe nun obradoiro de debuxo urbano, buscando coa actividade a súa sensibilización sobre a emerxencia climática e a necesidade de protección cara o medioambiente a través do debuxo. 

O curso, organizado polo Fondo Galego de Cooperación e Solidariedade coa colaboración da Concellería de Servizos Sociais de Fene encádrase no proxecto europeo ‘People and Planet’ cuxo obxectivo é empoderar e mobilizar á xente nova na loita contra o cambio climático, ligando cuestións locais con problemáticas globais que teñen impacto na vida das persoas en calquera lugar do mundo.
As obras que realizaron os/as participantes terán unha vida posterior tanto online como offline. Por unha parte, exporanse fisicamente nun espazo facilitado polo concello, complementándoas do xeito que sexa necesario para espallar a sensibilización. Doutra banda, dixitalizaranse para difundir a través da páxina web do proxecto, redes sociais, etc. a xeito de exposición virtual. Ademais, da actividade xurdirá un “tool kit” que permitirá replicala noutros lugares.

#PeopleAndPlanet