O Concello de Fene intensificou nos últimos días os labores de acondicionamento dos xardíns municipais e doutros espazos públicos do territorio. Durante o Estado de Alarma a maior parte dos recursos técnicos e humanos dedicáronse a tarefas de mantemento, prevención e hixiene. Porén, a medida que foi avanzando a desescalada, a área de Obras e Servizos foi retomando os traballos de conservación das áreas verdes, con dúas finalidades básicas: eliminar plantas e árbores secas ou que supuñan un perigo e, por outra banda, deixar os lugares preparados para acometer unha completa reordenación con novas variedades e, nalgúns casos, cunha nova distribución. Ademais, o consistorio acaba de presentar a súa solicitude para participar desde este ano no certame "Vilas en flor", que recompensa en todo o Estado as accións ambientais e de conservación en espazos públicos.
O repaso xeral que se lles está dando a todos os xardíns, parques e outras áreas verdes do municipio ten como obxectivo conter as medras da vexetación que se produciron nos últimos meses, pero tamén eliminar plantas e árbores secas ou en mal estado.
De feito, no parque liñal do Cádavo e tamén en San Valentín foi necesario cortar varios exemplares que comprometían a seguridade. Por outra banda, no barrio ribeirao cumpriu talar unha palmeira e retirar pés de camelias que practicamente tocaban nas fachadas dos primeiros andares e que, ademais, reducían considerablemente a entrada de luz nos baixos e nas vivendas inferiores.
Noutros puntos do municipio, o persoal municipal -apoiado por un equipo externo- está levando a cabo un repaso xeral dos espazos consistente na limpeza de herbas ventureiras, no segado e no control do volume de vexetación, xunto coa revisión do estado de saúde de árbores, flores e outras plantas ornamentais.
A intención de Obras e Servizos é facer unha especie de "reseteo" das zonas axardinadas para reordenalas todas de novo. Para iso eliminaranse especies secas ou difíciles de recuperar e incluso se planificarán plantacións novas que lle dean máis vigor e vistosidade á trama verde do municipio.
O programa atende ao obxectivo de mellorar a imaxe xeral de todo o concello, pero tamén á finalidade de que os parques e xardíns cumpran coa súa misión de reservas ambientais e lugares que contribúan á mellora da calidade de vida da veciñanza.
