Hai persoas que non falan galego desde sempre, senón que decidiron comezar a facelo nun momento determinado da súa vida. Son as imprescindibles neofalantes, das que estamos ben orgullos@s! E o 1 de outubro é o seu día, o Día do Orgullo Neofalante, desde que, de maneira retranqueira pero ben interesante, o declarou a AGAL - Associaçom Galega da Língua hai uns anos, coincidindo co aniversario do nacemento do exitoso cantante e neofalante orgulloso Andrés Dobarro (que neste 2021 cumpriría os 74 anos).
O 1 de outubro, Día do Orgullo Neofalante é unha data para para honrar a toda esa xente que se pasou ó galego con algúns aniños ao lombo e que intenta usalo aínda que cometa erros. Se é este o teu caso, non che deixes amolar e mostra con orgullo as túas equivocacións, todos somos novos en algo! Do mesmo xeito, se sodes galegofalantes dende sempre, podedes mostrar o voso apoio cara esta xente, que ben o merece! Tamén, se aínda non destes o paso e queredes facer desta lingua a vosa, que de mañá non pase! Sen medo, sen complexos.
Co lema “Súbete ao galego”, a Mancomunidade de Concellos da Comarca de Ferrol organizou, para o vindeiro 30 de setembro ás 19:00 h na Casa das Palmeiras de Neda, a presentación do documental BARULLO, acto no que intervirán Xosé Bocixa e Pepe Cunha. Realizado ao abeiro do Fondo de Proxectos Culturais Xacobeo 21, BARULLO é un Documental acerca da diversidade musical en lingua galega, con testemuñas e actuacións de grupos de pop, rock, tradicional, rap, canción de autor....
