Novas

19-07-2023 -
19-07-2023 -
Museo do Humor Xaquín Marín

Restauración do mural pola paz de Xaquín Marín na fachada do Concello

Tralo repintado do mural “Todos metidos nun bote” (Avda. das Pías), que a Concellería de Cultura promoveu hai un ano no marco das actividades ao redor da exposición antolóxica “Volta á orixe”, un grupo de usuarios/as do Centro Ocupacional de Aspaneps de Fene traballa estes días na recuperación doutro mural da Xaquín Marín, o que se amosa na fachada da Casa do Concello. Trátase dunha obra alusiva ao desarme e en favor da paz. O mural foi pintado orixinalmente no ano 1983, coincidindo coa declaración do termo municipal como “zona desnuclearizada”, o que significaba a “prohibición de autorización para instalación de enxeños nucleares, tanto bélicos como xeradores de enerxía, así como impedir o paso de camións con pezas para estas instalacións”. A actuación sobre este mural esta previsto que remate antes de finais de mes. 
Ver máis
19-07-2023 -
19-07-2023 -
Fene ao día

Doazón de sangue en Fene

A unidade móbil do Centro de Transfusións de Sangue de Galicia achégase a Fene este venres e o sábado. Instalarase diante do Centro de Saúde, na Avda. do Tarrío, o venres 21 de xullo, de 15.30 a 21.00 horas, e o sábado 22, de 10.00 a 15 horas. Dende a Axencia de Doazón de Órganos e Sangue lembran que para doar sangue unicamente cómpre ter máis de 18 anos e pesar máis de 50 kg. O momento ideal para facelo é logo de almorzar ou despois de xantar, agardando 2 horas. As persoas que desexen doar sangue deberán achegarse até a unidade móbil coa súa tarxeta de doazón, DNI ou documento similar e, no caso de estar tomando algún medicamento, tamén con informe do seu médico. Máis información en ados.sergas.gal ou no teléfono gratuíto 900 100 828.
Ver máis
18-07-2023 -
18-07-2023 -
Fene ao día

O autobús de Generación D, campaña estatal sobre competencias dixitais, recala en Fene

“Únete a la Generación D’, cada día somos más”, a campaña itinerante que impulsa o desenvolvemento das competencias dixitais visita Fene hoxe e mañá, 18 e 19 de xullo, en horario de 10.00 a 13.30 e de 17.00 a 20.30 h, e o xoves 20 de xullo, en horario de 10.00 a 13:30 h, situándose unha das súas unidades móbiles na Avda do Tarrío (zona Eroski). O autobús inclúe xogos e actividades que permitirán aos/as visitantes afondar nas súas habilidades dixitais, sacarlles partido e coñecer novas ferramentas que lles axuden a melloralas: chamadas e videochamadas, compras online, elaboración dun currículo ou dun album de fotos...
Ver máis
17-07-2023 -
17-07-2023 -
Cultura

Concertos e acto institucional na derradeira semana do ciclo Xullo, mes da Patria no Concello de Fene

Tralo éxito do espectáculo Aquí tou!, que o monologuista e actor Xosé Antonio Touriñán presentou en Fene este sábado, o ciclo “Xullo, mes da Patria” continúa esta semana cos concertos de Trikitrí e Fillas de Cassandra, o xoves 20 de xullo ás 21 horas, e Ataque Escampe e Familia Caamagno, o venres 21 de xullo ás 21 horas. O programa concluirá o sábado 22 coa lectura, ás 13 horas, da declaración institucional polo Día da Patria Galega e cun concerto ás 21 horas de Airiños de Fene e da Banda de Gaitas de Ortigueira. Todas as actividades serán -con entrada libre e de balde- na praza do alcalde Ramón José Souto González, agás o acto institucional que se fará, coma sempre, a carón do monumento Día da Patria Galega, no parque liñal do río Cádavo.
Ver máis
13-07-2023 -
13-07-2023 -
Cultura

Alberto Ruíz de Samaniego fala este venres en Fene sobre arte e trastornos mentais

No marco da IV exposición do alumnado do laboratorio de creación artística Laudas Calamity que se amosa este verán no Museo do Humor Xaquín Marín de Fene, o profesor de Estética e Teoría das Artes da Universidade de Vigo, Alberto Ruiz de Samaniego, impartirá este venres unha conferencia sobre “Arte e trastornos mentais”. A charla será ás 12 horas no Salón de Actos da Casa da Cultura de Fene, con entrada libre.
Ver máis
12-07-2023 -
12-07-2023 -
Cultura

Cambio de ubicación do espectáculo de Fantoches Baj previsto para este venres

Por mor das previsións meteorolóxicas que anuncian choiva para os vindeiros días, a Concellería de Cultura de Fene anuncia que o espectáculo infantil “Chulises e o velocíclope”, de Fantoches Baj, representarase o venres 14 de xullo na praza do alcalde Ramón J. Souto González (baixo carpa), a carón da Casa do Concello (e non en San Valentín como estaba previsto inicialmente). A cita será a partir das 21.00 horas con entrada libre e de balde.
Ver máis
10-07-2023 -
10-07-2023 -
Cultura

O Xullo, mes da Patria continúa esta semana co certame de Habaneras e os espectáculos de Fantoches Baj e Touriñán

A rondalla Perla do Río, do CCRD de Perlío, Estrelecer, do CMI Unidade de Fene, e as corais polifónicas da ACRD o Pote de Maniños e da SCRD Agarimo de Sillobre, xunto co Tradicoro da Asociación Airiños de Fene subirán este xoves, 13 de xullo, ao escenario da praza do alcalde Ramón José Souto González nunha nova edición do Festival de Habaneras e Canto Coral. O certame, organizado pola Concellería de Cultura no marco do ciclo “Xullo, mes da Patria”, comezará ás 20.30 horas na carpa instalada a carón da Casa do Concello. Entrada libre e de balde.
Ver máis
07-07-2023 -
07-07-2023 -
Deporte

Ximnasia de mantemento ao aire libre para gozar do verán en forma

No marco da programación deportiva estival do Concello de Fene, os arredores do pavillón polideportivo de San Valentín acollen durante os meses de xullo e agosto, os luns, mércores e venres pola mañá, a actividade “Ximnasia de mantemento ao aire libre”. Dirixida a persoas de todas as idades (xa que se parte dun nivel “suave”), con esta actividade física de grupo preténdese que os/as participantes “manteñan ou melloren a súa condición física xeral e pasen un rato agradable practicando deporte cos demais”. O mellor é que non precisa inscrición. As persoas interesadas en sumarse ao grupo de “Ximnasia de mantemento ao aire libre”, unicamente teñen que presentarse no lugar sinalado, no entorno do pavillón da Xunqueira, uns minutos antes do comezo da actividade. As sesións son todos os luns, mércores e venres laborables, de 9.45 a 10.45 horas.
Ver máis
06-07-2023 -
06-07-2023 -
Benestar e igualdade

A Mocidade Activa de Fene, Mugardos e Neda xa está en marcha

Este martes botou a andar o programa Mocidade Activa que están a desenvolver as áreas de Benestar e Igualdade dos Concellos de Fene, Mugardos e Ares. A actividade enmarcase nun proxecto de prevención de condutas aditivas no eido local que se realiza coa colaboración coa Consellería de Sanidade. Mocidade Activa vai dirixido a mozos e mozas con idades comprendidas entre os 11 e os 16 anos. Dende os Servizos Sociais de Fene informan de que quedan dispoñibles dúas prazas libres que, no caso de que haxa persoas interesadas en participar, se cubriran por orde de inscrición. As solicitudes enviaranse ao correo electrónico: servizos.sociais@fene.gal
Ver máis
06-07-2023 -
06-07-2023 -
Museo do Humor Xaquín Marín

Borja Ramón López Cotelo, Lucía Rodríguez Cid e Iván Mouronte Barreiro son os gañadores do XXVII Concurso de Humor Gráfico Curuxa do Humor

Logo das oportunas deliberacións, na xuntanza celebrada este mércores, 5 de xullo, no Museo do Humor Xaquín Marín, o xurado do XXVII concurso de humor gráfico Curuxa do Humor acordou outorgar a Borja Ramón López Cotelo, “El primo Ramón”, o primeiro premio Curuxa (categoría para maiores de 25 anos), a Lucía Rodríguez Cid o primeiro premio Curuxa Nova (categoría de 16 a 25 anos) e a Iván Mouronte Barreiro o 1º premio na recén estreada categoría Caricatura (para maiores de 16 anos). Ademais, resultaron finalistas do certame Manuel Arriaga de León (Curuxa), Adrián Jamardo Fernández (Curuxa Nova) e Iván Mata Tamayo (Caricatura). E reciben mención especial polos seus traballos os debuxantes Carles Ponsí Dalfó (Curuxa) e Asier Sanz Nieto (Caricatura). O xurado estivo integrado, ademais de polo alcalde de Fene, Juventino Trigo, polo concelleiro de Cultura, Justo Martínez Ardá; pola responsable do Museo do Humor Xaquín Marín, Almudena Marcos, e polos humoristas gráficos Santy Gutiérrez, Manuel A. Vázquez Búa (gañador do 2º premio Curuxa 2022) e Pedro Bouza Bernárdez (gañador do 1º premio Curuxa Nova 2022).
Ver máis
1 2 ...65 66 6768 69 ...132 133 >>