Novas

28-06-2022
28-06-2022

Xabier Díaz, volta á orixe

Co concerto de Xabier Díaz e Adufeiras do Salitre arrinca o diclo “Xullo, mes da Patria”.
A cita será o venres, 1 de xullo, ás 21:00 h, no paseo marítimo de San Valentín, con entrada de balde.
O concerto terá lugar na parroquia que hai 40 anos acolleu os comezos musicais de Xabier Díaz, na escola de gaitas do CPS San Valentín, dirixida polo mestre Manolo Doval.
Xabier Díaz regresa coas Adufeiras de Salitre, Roberto Grandal, tamén veciño de Fene, e Iván Costa  para cantar e bailar co seu terceiro álbum As catedrais silenciadas

As catedrais silenciadas, é quizais a obra que mellor reflicte a esencia do seu encontro e, tamén, a que explora os límites deste formato con maior profundidade. Este último traballo actualiza diferentes tipos de formas musicais: hai pasodobres como No Salón das Cereixas, xotas como Illas de Sal, alalás como o tema que da título ao disco, ribeiranas como Tentenublo e muiñeiras e agarrados como o de Vilar de Cabeiras 2.0.

As vindeiras citas do ciclo  serán;

Xoves, 7 de xullo, ás 21:00 h, na praza do alcalde Ramón José Souto González, monólogo de Pepo Suevos co espectáculo Humor salvaxe (Rede Cultural).

Venres, 8 de xullo, ás 18.00 h., festa infantil na Praza do alcalde Ramón José Souto González.

Toda a información aquí
Ver máis
20-06-2022
20-06-2022

XXXV edición do Premio Nacional de Poesía Xosemaría Pérez Parallé

O Círculo Mercantil e Industrial Unidade de Fene convoca, coa colaboración do Concello de Fene, a XXXV edición do Premio Nacional de Poesía Xosemaría Pérez Parallé. O certame, que naceu para homenaxear a quen fora un dos seus máis renomeados socios, ten como obxectivo premiar un libro de autor inédito en lingua galega, promovendo así a inclusión de novas voces no sistema literario galego.
As persoas que desexen participar no certame deberán presentar, antes da medianoite do vindeiro 16 de setembro, un libro de poesía en lingua galega cunha extensión mínima recomendada de 300 versos.
Ver máis
20-06-2022
20-06-2022

Cambio de horario na Casa da Cultura de Fene

Coa chegada do verán, a concellería de Cultura informa do cambio de horario da Casa da Cultura de Fene (Biblioteca Municipal, aula de estudo, Museo do Humor e sala de exposicións temporais) que coincide, como é habitual, co comezo das vacacións escolares. Así, dende o xoves 23 de xuño e até o vindeiro 7 de setembro, ámbolos dous inclusive, o horario da Biblioteca Municipal Xosemaría Pérez Parallé será de luns a venres, de 10.00 a 14.15 horas. No que respecta aos demais servizos da Casa da Cultura (Museo do Humor, sala de exposicións temporais e aula de estudo), o comezo do horario de verán adíase até o vindeiro martes, logo da clausura da exposición “Volta á orixe”, de Xaquín Marín, que está prevista para o luns 27 de xuño.
Ver máis
08-06-2022
08-06-2022

Admitidos/as no verán máis alá 2022

Publicado o listado de admitidos/as no verán máis alá 2022. Nesta fase de matriculación, os pais/nais deberán achegar a documentación especificada nas bases do programa: ficha de datos, ficha médica, informe médico (de ser preciso), declaración de autorizacións, fotografía, xustificante de pagamento da cota, copia da tarxeta sanitaria,.....
Tamén neste caso, a achega de documentación poderá realizarse por vía telemática e de maneira presencial (solicitando cita previa a partir do día 9 de xuño no teléfono 981.340.366 )

As familias con praza poderán formalizar a matriculación en "Verán Máis Alá" do día 15 ao 17 de xuño.

O custo da actividade para o mes completo é 68,15 € (2º membro da unidade familiar 36,70 €); para unha quincena o custo é 34,08 € (2º membro 18,35 €)

Ademais, en situación de escasa capacidade económica, “as tarifas poderán reducirse no 50% e mesmo acceder gratuitamente a esta actividade nos termos sinalados no artigo 4) da Ordenanza fiscal núm. 2”.

Por último, a Concellería de Cultura lembra que haberá unha reunión previa cos pais/nais/titores dos/as participantes no Salón de Plenos da Casa do Concello o xoves 30 de xuño ás 20:00 horas.

Para máis información sobre o programa cómpre chamar ao Departamento de Cultura e Deportes (tfno. 981 340 366) ou enviar un correo electrónico a cultura.deportes@fene.gal.
Ver máis
03-06-2022
03-06-2022

Asinados os convenios de colaboración correspondentes ás subvencións nominativas para os festivais Felicia Pop e Fenerock

O alcalde de Fene, Juventino Trigo, o concelleiro de Cultura, Justo Ardá, e representantes das asociacións Felicia A.C. e Os Centolos A.C. reuníronse este xoves na Casa do Concello para asinar os convenios de colaboración entre o Concello de Fene e ámbalas dúas entidades ao obxecto de organizar os festivais Felicia Pop e Fenerock 2022. Convenios que, no seu conxunto, suman 22.000€, a razón de 11.000€ para cada unha das sociedades. Con estas aportacións, o Goberno Municipal de Fene pretende apoiar a organización de dous certames que, pola súa traxectoria e especial interese, son xa un referente no calendario de festivais de música en Galicia.
Ver máis
01-06-2022
01-06-2022

Fene participa na V edición de Primavera no Camiño Inglés

A Alameda de Góis de Sigüeiro (Oroso) acollerá este sábado a quinta edición de Primavera no Camiño Inglés, unha iniciativa promovida pola Asociación de Concellos do Camiño Inglés coa colaboración da Deputación da Coruña e o Concello de Oroso coa que se pretende poñer en valor os múltiples atractivos etnográficos, culturais, naturais e gastronómicos desta ruta xacobea. Participarán nesta xornada os 18 municipios polos que discorre o Camiño Inglés: A Coruña, Abegondo, Betanzos, Cabanas, Cambre, Carral, Culleredo, Fene, Ferrol, Mesía, Miño, Narón, Neda, Ordes, Oroso, Paderne, Pontedeume e Santiago de Compostela. E, segundo avanzan dende a organización, ao longo do día haberá actividades gastronómicas e culturais, baile, música, obradoiros gratuítos para nenos e nenas, e mercado de artesanía. O Concello de Fene estará representado nesta V Primavera no Camiño Inglés cun stand no que se achegará información turística aos visitantes. Ademais, ás 11.30 horas, está prevista unha actuación da Banda Xuvenil de Airiños de Fene.
Ver máis
31-05-2022
31-05-2022

Festival de fin de curso das Escolas Municipais de Música

As Escolas Municipais de Piano e Guitarra 2021/22 do Concello de Fene chegan ao seu fin. Por este motivo, a Concellería de Cultura organiza para este xoves, 2 de xuño, o festival de clausura de ámbalas dúas actividades ás que asistiron ao longo do presente curso escolar ao redor de 40 persoas. O certame comezará o xoves ás 17 horas no salón de actos da Casa da Cultura de Fene e terá como protagonista ao alumnado infantil e xuvenil das devanditas escolas.
Ver máis
27-05-2022
27-05-2022

ContandoCiencia chega ao seu fin cunha conferencia do biólogo Xurxo Mariño

A Casa da Cultura de Fene acollerá o mércores 1 de xuño a derradeira sesión do ciclo Contando Ciencia que organiza a Biblioteca do IES de Fene coa colaboración da Concellería de Ensino. O protagonista desta sexta e derradeira charla será o doutor en Bioloxía e profesor da UDC Xurxo Mariño. Falará sobre “Unha mirada á evolución da linguaxe” o vindeiro mércores ás 19.30 h. no salón de actos da Casa da Cultura, con entrada libre e de balde até completar o aforo.
Ver máis
25-05-2022
25-05-2022

O mércores 1 de xuño abre o prazo de preinscrición para o Verán máis alá! 2022

Un ano máis, a Concellería de Cultura pon en marcha o Verán Máis Alá de Fene, campus lingüístico co que se pretende “facilitar unha alternativa de lecer educativo, na nosa lingua, á vez que se promove a conciliación da vida laboral e familiar”. O programa vai dirixido ao alumnado escolarizado en educación infantil e primaria nado entre os anos 2010 e 2018 (idades de referencia de 3 a 12 anos) e desenvolverase nas instalacións do CEIP de Centieiras do 4 ao 29 de xullo en horario de 8:00 a 14:00 h.. Para participar cómpre ser veciño/a de Fene (empadroado/a en Fene como mínimo dende o 2 de maio de 2022) ou acreditar ter estado escolarizado/a nun centro de ensino do concello ao longo do presente curso escolar. Ademais, novamente, o criterio de selección non será o da orde de inscrición senón a situación socio-laboral das familias.
Ver máis
19-05-2022
19-05-2022

Fene acolle este venres un obradoiro de debuxo urbano a cargo da escola de BD O Garaxe Hermético

Dirixido a mozos/as de 14 a 20 anos, trátase dun taller co que se pretende sensibilizar á xuventude sobre a emerxencia climática e a necesidade de protección cara o medioambiente a través do debuxo. Para iso, ensinaranse as técnicas básicas para o debuxo de campo e o traballo ao natural. O curso, organizado polo Fondo Galego de Cooperación e Solidariedade coa colaboración da Concellería de Servizos Sociais de Fene, será apto para todos os niveis, incluído o de iniciación. Ao fronte da actividade, que terá lugar este venres, de 16.30 a 20.30 no barrio de San Valentín, estará un mestre da Escola Profesional de Banda Deseñada “O Garaxe Hermético”, de Pontevedra. As persoas que desexen anotarse deberán enviar por correo a servizos.sociais@fene.gal a ficha de inscrición cuberta antes do venres 20 de maio ao mediodía. As prazas son limitadas (15) e cubriranse por rigorosa orde de inscrición.
Ver máis
1 2 ...15 16 1718 19 ...52 53 >>