Novas

09-12-2020
09-12-2020

Cultura segura para un “Nadal diferente” no Concello de Fene

A Concellería de Cultura ultima a programación de actividades que se desenvolverán do 17 de decembro ao 5 de xaneiro no marco da programación de Nadal 2020-2021. Baixo o lema “Un Nadal Diferente”, o ciclo incluirá unha sesión de contacontos para bebés, o tradicional concerto de Nadal e un segundo concerto a cargo de Nuevo Plan e finalizará coa recepción das SS MM Os Reis Magos de Oriente. Tódalas actividades estarán condicionadas ás restriccións derivadas da pandemia provocada pola Covid 19 e desenvolveranse baixo estritos protocolos de seguridade e hixiene. Neste senso, a través deste web municipal (www.fene.gal), o Concello de Fene informará en vísperas de cada unha das actividades das datas e procedementos a seguir para a adquisición das entradas, no caso de ser preciso.
Ver máis
09-11-2020
09-11-2020

Aprázase o concerto de Sés previsto para este sábado

Logo das últimas medidas adoptadas pola Xunta de Galicia (DOG núm. 223, do 04.11.20) para facer fronte á Covid 19, o Goberno Municipal de Fene acordou adiar para o vindeiro mes de marzo o concerto de Sés que ía ter lugar este sábado, 14 de novembro, na Praza do alcalde Ramón José Souto González.

Aínda que até o último momento barallouse a posibilidade de mantelo na data prevista, “xa que estabamos en condicións de garantir un concerto seguro” e a Dirección Xeral de Saúde autorizara ao aumento do aforo até as 146 persoas, finalmente o goberno municipal decidiu aprazalo “á agarda de que a situación sanitaria permita converter o
concerto nunha festa á que se achegue moita máis xente de Fene e da bisbarra e contribúa a dinamizar o tecido económico do Concello”.
Ver máis
05-11-2020
05-11-2020

A Biblioteca Municipal de Fene súmase á conmemoración do mes da ciencia en galego

Trala exposición adicada a Carvalho Calero, a biblioteca municipal de Fene abre hoxe
unha pequena mostra bibliográfica de contido científico, dirixida a lectores/as de todas as idades. A iniciativa encádrase na conmemoración do “Mes da Ciencia en Galego nas Bibliotecas” que promove a Consellería de Cultura entre os centros da rede pública. O obxectivo é “sensibilizar aos máis novos sobre a necesidade de empregar o galego na literatura científica”.

A exposición “Mes da ciencia” inclúe unha selección de títulos para todos os públicos e idades como “Po de estrelas”, “Un ronsel de Ardora”, “As vidas de Galileo” ou “O valor das ideas” (no campo de literatura infantil e xuvenil); “Miscelánea Zoolóxica”, “Cando as estrelas caen do ceo”, “Suma da lóxica” ou “Verbo da teoría da relatividade” (para adultos). A mostra permanecerá aberta até o 30 de novembro no horario habitual da biblioteca: de luns a venres, de 16 a 21 horas, e os sábados, de 10 a 13 horas. Os domingos e festivos estará pechada.
Ver máis
03-11-2020
03-11-2020

Sara Plaza Moreno obtén a XXXIII Edición do Premio Nacional de Poesía Xosemaría Pérez Parallé

Sara Plaza Moreno, nada en Bustarviejo, na serra de Madrid, en 1972, obtivo a XXXIII edición do Premio Nacional de Poesía Xosemaría Pérez Parallé, que convoca o Círculo Mercantil e Industrial-Unidade de Fene, co apoio do Concello de Fene.
O xurado escolleu o libro de Sara Plaza Moreno, titulado todos os pasos fan ruído, de entre 76 obras presentadas a concurso este ano.

Trátase da XXXIII edición deste Premio, creado para homenaxear o poeta fenés Xosemaría Pérez Parallé, coñecido como O Segrel do Penedo. Poeta popular, activista literario, promotor da celebración en Galiza do Día das Letras Galegas que fora instituído polas colectividades galegas do exilio.
Ver máis
23-10-2020
23-10-2020

Adiada a XXXII Xuntanza de Gaiteiros de Airiños de Fene

Perante as condicións meteorolóxicas adversas previstas para este sábado -alerta laranxa por vento intenso de forza 8 en boa parte do litoral da provincia da Coruña-, a Banda de Gaitas Airiños de Fene e o Concello de Fene tomaron a decisión de aprazar a XXXII Xuntanza de Gaiteiros, prevista para mañá ás 20.00 horas na Praza do alcalde Ramón José Souto González. O festival, que ía contar nesta edición coa actuación do grupo Tiruleque, realizarase finalmente noutra data da que informarán as entidades organizadoras próximamente.
Ver máis
19-10-2020
19-10-2020

Este martes abre o prazo de reserva de entradas para asistir á XXXII Xuntanza de Gaiteiros de Airiños de Fene

A praza do alcalde Ramón José Souto González acolle este sábado, ás 20.30 horas, unha nova edición da Xuntanza de Gaiteiros que organiza Airiños de Fene coa colaboración do Concello. Atendendo aos protocolos para facer fronte á Covid-19, nesta ocasión o certame terá lugar baixo estritas medidas de seguridade e hixiene, con aforo limitado a 146 persoas e con reserva previa de entradas a través de Ataquilla.com. Ademais, como novidade, esta XXXII Xuntanza Airiños de Fene será a primeira que se retransmita por streaming e, aínda que nesta ocasión non haberá homenaxeado, sí contará coa actuación “dun grupo amigo e de grande calidade” como é Tiruleque. 

Nesta edición de 2020 a Xuntanza de Gaiteiros de Airiños de Fene reinvéntase e ofrece a posibilidade de asistir ao encontro presencialmente ou virtualmente.
Ver máis
15-10-2020
15-10-2020

A biblioteca municipal de Fene anuncia o aprazamento da actuación de Ghazafellos desta tarde


Por razóns alleas á organización, suspéndese a terceira e última función do ciclo “Ler
conta moito” que ía ter lugar esta tarde na Casa da Cultura de Fene. Segundo informan dende biblioteca municipal, o contacto dun dos membros da compañía cun positivo por Covid-19 motivou a corentena do elenco do grupo ao completo, razón pola cal non poderán actuar finalmente esta tarde en Fene.

Perante esta incidencia, a función de Ghazafellos co espectáculo “A máquina do tempo” adíase para o 29 de outubro ás 18.00 horas, manténdose a reserva de prazas para
as persoas que tiñan confirmada a súa asistencia esta tarde.
Ver máis
14-10-2020
14-10-2020

A biblioteca municipal de Fene conmemora o Día das Escritoras cunha mostra bibliográfica

Até o vindeiro 19 de outubro, a biblioteca Xosemaría Pérez Parallé de Fene acolle unha pequena mostra bibliográfica adicada ás escritoras. A iniciativa encádrase na conmemoración do Día das Escritoras que promove a Biblioteca Nacional de España en colaboración coa Federación Española de Mulleres Directivas, Executivas, Profesionais e Empresarias (FEDEPE) e a Asociación Clásicas e Modernas. A exposición amósase nesta instalación municipal de luns a venres, de 16.00 a 21.00 horas, e o sábado, de 10.00 a 13.00 horas.

Dende o ano 2016, o Día das Escritoras “busca reivindicar a labor e o legado das mulleres escritoras ao longo da historia, a partir da lectura de fragmentos representativos das súas obras”. Cada ano, esta celebración ten lugar o luns máis próximo á festividade de Teresa de Jesús (15 de outrubro).
Ver máis
09-10-2020
09-10-2020

O ciclo Ler conta moito finaliza o vindeiro xoves cunha actuación de Ghazafellos

Xa se poden reservar entradas para asistir o vindeiro xoves, 15 de outubro, á derradeira función do ciclo “Ler conta moito” que organiza a biblioteca municipal de Fene no marco do programa para a dinamización da lectura da Xunta de Galicia. Nesta terceira e última sesión, a compañía Ghazafellos presentará a partir das 18 horas o espectáculo “A máquina do tempo”, dirixido a nenos/as de 5 a 11 anos. A entrada será gratuíta pero con aforo limitado a 20 persoas (10 nenos/as e 10 adultos/as). Para asistir cómpre chamar por teléfono á biblioteca de luns a venres, de 16 a 21 horas, ou os sábados, de 10 a 13 horas (teléfonos de contacto: 981342302 / 607625346).

En “A máquina do tempo", “a doutora Mon e o seu axudante Pe, logran construir unha máquina do tempo coa que nos amosarán a verdadeira historia das civilizacións mandando a Pe e a algún voluntario ou voluntaria a distintas épocas da nosa historia”.
 
Ver máis
08-10-2020
08-10-2020

Este venres abre o prazo de solicitude do Bonobús Universitario para o curso 2020-2021

Facilitar o desprazamento diario, de luns a venres, no traxecto Fene-A Coruña-Fene para o estudantado universitario fenés que estea matriculado en calquera dos campus da cidade de A Coruña durante este curso 2020-2021 é o obxectivo do programa Bonobús Universitario que convoca un ano máis a Concellería de Cultura do Concello de Fene. Trala publicación das bases da convocatoria no BOP núm. 168 do xoves 8 de outubro de 2020, o prazo de presentación de solicitudes permanecerá aberto dende o venres 9 ao luns 19 de outubro, ámbolos dous incluídos.
Ver máis
1 2 ...18 19 2021 22 ...48 49 >>