Novas

30-07-2020

O campamento “Un verán diferente” chega ao seu fin

Último día no campamento “Un verán diferente” que se está a desenvolver nas instalacións do Ceip Centieiras de Perlío coa asistencia de corenta e un nenos e nenas de Fene. Nesta derradeira semana, os/as participantes realizaron xogos de auga, actividades de equilibrio, xogos cooperativos e alternativos, obradoiros de volvoretas, herbarios e talleres de cociña saudable, entroutras actividades. Ademais, aproveitando o bo tempo, visitaron o parque Castelao. Para festexar a fin do campamento, os/as responsables da actividade programaron para hoxe unha xornada especial na que os nenos/as realizarán os seus xogos preferidos da programación.
24-07-2020

"Saúde e canta o paspallás"

Con estas verbas, a ceramista fenesa Carme Romero rematou esta tarde a lectura da declaración institucional do Día da Patria Galega, rememorando aqueles anos nos que "rematando a guerra do 36, o ser galeguista era tan perseguido que un grupo de amigos entre os que se atopaba Pérez Parallé", para se reunir usaban como contrasinal "Saúde e canta o paspallás". Durante a súa intervención, a impulsora da Escola de Cerámica do Muíño do río Va (Maniños), serviuse das súas experiencias vitais e profesionais para reivindicar o noso patrimonio material e inmaterial e, particularmente, a nosa lingua. No acto, que tivo lugar a carón do "Monumento 25 de xullo. Día da Patria Galega", no parque liñal do río Cádavo, a artista estivo acompañada polo alcalde de Fene Juventino Trigo, polo concelleiro de Cultura, Justo Ardá, membros da Corporación Municipal de Fene e numerosos veciños e veciñas.
 
24-07-2020

Un verán diferente para corenta e un nenos e nenas de Fene

O campamento “Un verán diferente”, que se está a desenvolver nas instalacións do Ceip Centieiras de Perlío, chega ao seu ecuador cumprindo os obxectivos marcados pola Concellería de Cultura de Fene de combinar as actividades lúdicas, deportivas e educativas coa concienciación e o coidado hixiénico-sanitario dos/as participantes fronte á Covid-19. Ao longo desta semana, as nenas e nenos realizaron actividades nas hortas didácticas e na cociña solar de Aspaneps. Ademais, participaron en distintos xogos de auga e de psicomotricidade; realizaron experimentos e asistiron a talleres de cociña saudable, entroutras moitas actividades. Para seguir a evolución do programa, pódese consultar o blog de "Un verán diferente" onde se van publicando a diario información e fotografías das actividades realizadas.
24-07-2020

A exposición do XVI Certame Isaac Díaz Pardo de Artes Plásticas amósase en Fene até o 28 de agosto

Xa se pode visitar na Casa da Cultura de Fene a exposición do XVI Premio Isaac Díaz Pardo de Artes Plásticas, promovido pola Deputación da Coruña. A mostra inclúe as pezas do artista gañador do certamen nesta edición, que resultou ser Mauro Trastoy, e doutros once creadores seleccionados polo xurado. Así, amósanse obras de Carlos Maciá, Marcos Costa Moreira, Mikel Vergara, José Luís Seara, Verónica Moar, Joan Morera, Pablo Barreiro ou Tatiana Medal, entroutros artistas.   O horario de visitas é de luns a venres, de 10.30 a 13.30 horas.
21-07-2020

O Parque Liñal do Cádavo acollerá este venres o acto institucional co gallo do Día da Patria Galega

Fene non renuncia neste 2020 a celebrar o 25 de Xullo, Día da Patria Galega, aínda que sexa cun acto sinxelo e adaptado ás novas medidas preventivas da COVID-19. A Corporación Municipal e maila veciñanza que queira participar do acto reuniranse no monumento que conmemora a data -situado no Parque Liñal do río Cádavo- para escoitaren a xa tradicional declaración institucional. Da súa lectura encargarase nesta ocasión a artista local Carme Romero Díaz, impulsora da Escola de Cerámica do Muíño do río Va, en Maniños.
15-07-2020

Comeza o campamento “Un verán diferente” con especial atención ás medidas de hixiene e prevención fronte á Covid 19

Corenta e unha nenas e nenos participan dende hoxe no campamento de conciliación da vida laboral e familiar “Un verán diferente” que organiza a Concellería de Cultura de Fene. O programa desenvolverase no CEIP Centieiras de Perlío até finais do mes de xullo e centrará o seu proxecto nas actividades ao aire libre, tal e como se recolle nas recomendacións e medidas para o desenvolvemento das actividades de educación non formal, ocio educativo e tempo libre adaptadas á situación de COVID-19, publicadas pola Xunta de Galicia.
15-07-2020

Presentación do libro gañador do XXXII Certame Premio Nacional de Poesía Pérez Parallé

As instalacións do CMI Unidade de Fene acollen este sábado, 18 de xullo, a partir das oito do serán, a presentación de Deriva, de Regina Touceda, libro gañador do XXXII Certame Premio Nacional de Poesía Pérez Parallé que ve a luz coa colaboración da editorial Espiral Maior e do Concello de Fene.  O acto, que ía celebrarse inicialmente o pasado 16 de maio, tivo que aprazarse por mor da pandemia provocada pola Covid-19.  O alcalde de Fene, Juventino Trigo, o fundador e director literario da editorial Espiral Maior, Miguel Anxo Fernán Vello e o coordinador do certame, o tamén escritor Eduardo Estévez, acompañarán este sábado a Regina Touceda na presentación do seu libro. O acto completarase coa actuación do grupo Encrucillada.
07-07-2020

Últimos días para participar no XXIV Concurso de Humor Gráfico “Curuxa do Humor”

Este venres 10 de xullo finaliza o prazo para presentar obras a unha nova edición dos “Premios Curuxa” do Museo do Humor. As persoas interesadas en participar, poderán enviar os seus debuxos até as 23.59 horas do venres ao Rexistro Xeral do Concello de Fene (Praza do alcalde Ramón Souto González, s/n, Fene). En próximas datas o Concello de Fene dará a coñecer a composición do xurado e a data na que se dará a coñecer o fallo.
18-06-2020

Reapertura da aula de estudio da Casa da Cultura

A biblioteca municipal Xosemaría Pérez Parallé anuncia para o vindeiro luns 22 de xuño a reapertura da aula de estudio ubicada no primeiro andar da Casa da Cultura. Para prestar novamente este servizo coa máxima seguridade, as persoas usuarias deberán solicitar cita previa nos teléfonos 981 34 23 02 / 607 625 346 (a atención telefónica será en horario de luns a venres, de 09:00 a 14:00 horas) ou enviar un correo a
fene.rbgalicia@eidolocal.es

Unha vez confirmada a cita, os/as usuarios/as do servizo só poderán facer uso da mesa e a cadeira que lles asigne o persoal no mostrador da biblioteca, que garantirá a distancia mínima de separación entre elas. Ademais, controlarase o aforo á aula de estudio e habilitarase unha única mesa por persoa, que se hixienizará logo de cada uso.
 
18-06-2020

Admitidas todas as persoas preinscritas no programa “Un verán diferente”, o 22 de xuño comeza a fase de matriculación.

As concellerías de Cultura e Deportes informan que, unha vez rematado o período de preinscrición, todas as persoas que a formalizaron e que figuran no listado que aparece no apartado de Descargar, resultaron admitidas en “Un verán diferente”.
A segunda quincena deste programa, do 3 ao 20 de agosto, non se vai levar a cabo ao non acadarse o mínimo do 50% das prazas ofertadas.

Como consecuencia da supresión da quincena de agosto, increméntase tanto o número de prazas na quenda de xullo (de 40 a 47) coma o de monitores/as á fronte da actividade para garantir a ratio de 1 monitor/a por cada 7 nenos/as que recomenda a Consellería de Política Social.
As persoas preinscritas teñen que efectuar a matriculación entre o 22 e o 30 de xuño.