Novas

24-07-2020 -
24-07-2020 -
Cultura

Un verán diferente para corenta e un nenos e nenas de Fene

O campamento “Un verán diferente”, que se está a desenvolver nas instalacións do Ceip Centieiras de Perlío, chega ao seu ecuador cumprindo os obxectivos marcados pola Concellería de Cultura de Fene de combinar as actividades lúdicas, deportivas e educativas coa concienciación e o coidado hixiénico-sanitario dos/as participantes fronte á Covid-19. Ao longo desta semana, as nenas e nenos realizaron actividades nas hortas didácticas e na cociña solar de Aspaneps. Ademais, participaron en distintos xogos de auga e de psicomotricidade; realizaron experimentos e asistiron a talleres de cociña saudable, entroutras moitas actividades. Para seguir a evolución do programa, pódese consultar o blog de "Un verán diferente" onde se van publicando a diario información e fotografías das actividades realizadas.
Ver máis
24-07-2020 -
24-07-2020 -
Fene ao día

Os GALP promoven o coñecemento do sector pesqueiro na busca do relevo xeracional

O Grupo de Acción Local Golfo Ártabro Norte -do que forma parte Fene- iniciou estes días canda outros proxectos de desenvolvemento costeiro de Galicia o proxecto RELEVO2020, co que se pretende atraer a mocidade de 16 a 30 anos cara ás actividades relacionadas co mar como unha opción de futuro. Dentro deste proxecto ofreceráselle á xuventude unha visión xeral sobre o sector pesqueiro e formación máis específica que lles sirva de punto de partida para traballar por conta allea ou emprender nunha parte fundamental da nosa economía que desde hai anos ten na falla de relevo xeracional un dos seus principais problemas.  O programa estrutúrase en dúas quendas de catro meses, unha de setembro a decembro deste ano e outra de xaneiro a abril de 2021. Para cada unha delas ofértanse 15 prazas.
Ver máis
24-07-2020 -
24-07-2020 -
Cultura

A exposición do XVI Certame Isaac Díaz Pardo de Artes Plásticas amósase en Fene até o 28 de agosto

Xa se pode visitar na Casa da Cultura de Fene a exposición do XVI Premio Isaac Díaz Pardo de Artes Plásticas, promovido pola Deputación da Coruña. A mostra inclúe as pezas do artista gañador do certamen nesta edición, que resultou ser Mauro Trastoy, e doutros once creadores seleccionados polo xurado. Así, amósanse obras de Carlos Maciá, Marcos Costa Moreira, Mikel Vergara, José Luís Seara, Verónica Moar, Joan Morera, Pablo Barreiro ou Tatiana Medal, entroutros artistas.   O horario de visitas é de luns a venres, de 10.30 a 13.30 horas.
Ver máis
22-07-2020 -
22-07-2020 -
Fene ao día

Os concellos da banda sur da ría compartirán o programa de emprego xuvenil INICIA V

Fene, Ares, Mugardos, Neda e Cabanas levarán a cabo a partir do 15 de setembro a quinta edición do proxecto formativo e de inserción laboral INICIA, dirixido a mocidade desempregada que queira mellorar as súas competencias de cara á súa integración no mercado laboral. O proxecto está subvencionado pola Xunta e pola Unión Europea a través dos fondos do FSE. Ofértanse 16 prazas para mocidade de entre 18 e 30 anos que, obrigatoriamente, ha de estar empradroada nalgún dos cinco municipios e estar inscrita no programa de Garantía Xuvenil. Para obter máis información pódese contactar coa área municipal de Formación e Emprego  "Pacho Allegue" no 981 492 767 ou en orientacion.laboral@fene.gal.
Ver máis
22-07-2020 -
22-07-2020 -
Museo do Humor Xaquín Marín

Sebastiá Martí Benedí e Hugo Feal Permuy son os gañadores do XXIV Concurso de Humor Gráfico Curuxa do Humor de Fene

Logo das oportunas deliberacións, na xuntanza celebrada este mediodía no Museo do Humor de Fene, o xurado do XXIV concurso de humor gráfico Curuxa do Humor acordou outorgar a Sebastiá Martí Benedí o primeiro premio Curuxa (categoría para maiores de 25 anos) e a Hugo Feal Permuy o primeiro premio Curuxa Nova (categoría de 16 a 25 anos). Así mesmo, Robert John Holt Schmelzer e Luciano Ripio Molina alzáronse co segundo premio nas categorías Curuxa e Curuxa Nova, respectivamente. O xurado estivo integrado, amais de polo alcalde de Fene Juventino Trigo, polo concelleiro de Cultura Justo Martínez Ardá, pola responsable do Museo do Humor Almudena Marcos, e polos humoristas gráficos Luís Davila, Sandra Lodi e Javier Jareño López-Cuervo (estes últimos, dous dos gañadores do certame en 2019).
Ver máis
21-07-2020 -
21-07-2020 -
Cultura

O Parque Liñal do Cádavo acollerá este venres o acto institucional co gallo do Día da Patria Galega

Fene non renuncia neste 2020 a celebrar o 25 de Xullo, Día da Patria Galega, aínda que sexa cun acto sinxelo e adaptado ás novas medidas preventivas da COVID-19. A Corporación Municipal e maila veciñanza que queira participar do acto reuniranse no monumento que conmemora a data -situado no Parque Liñal do río Cádavo- para escoitaren a xa tradicional declaración institucional. Da súa lectura encargarase nesta ocasión a artista local Carme Romero Díaz, impulsora da Escola de Cerámica do Muíño do río Va, en Maniños.
Ver máis
20-07-2020 -
20-07-2020 -
Museo do Humor Xaquín Marín

O xurado do XXIV Concurso de humor gráfico “Curuxa do Humor” reúnese este mércores

O humorista gráfico Luís Davila, “O bichero”, xunto coa gañadora do 2º premio Curuxa 2019, Sandra Lodi, e o do 1º premio Curuxa Nova 2019, Javier Jareño López Cuervo, son os debuxantes convidados que formarán parte este ano do xurado dos Premios Curuxa 2020, convocados polo Concello de Fene (Museo do Humor). Tal e como se establece nas bases do certame, o xurado estará presidido polo alcalde de Fene, Juventino Trigo e -xunto cos tres artistas convidados- formarán parte do mesmo o concelleiro de Cultura, Justo Ardá e a coordinadora do Museo do Humor, Almudena Marcos (que actuará como secretaria). Trala xuntanza, que terá lugar este mércores ás 12.00 horas no Museo do Humor, o Concello de Fene dará a coñecer o nome dos/as gañadores/as do certame este ano. 
Ver máis
17-07-2020 -
17-07-2020 -
Benestar e igualdade

Abre o prazo para participar no grupo de apoio emocional para mulleres do Proxecto Indira IV

A Concellería de Benestar Social e Igualdade do Concello de Fene, a través do Servizo Municipal de Atención á Muller, pon en marcha un novo espazo para mulleres enmarcado dentro do denominado Proxecto INDIRA, xa desenvolvido nos anos 2018 , 2019 e 2020. Baixo o lema “Os labirintos da vida cotiá”, a actividade levarase a cabo dende o 4 de agosto ao 17 de setembro, con sesións os martes e xoves de 10:00 h a 12:00 h (podería modificarse segundo preferencia e dispoñibilidade do grupo que se forme) no Centro Municipal de Servizos Sociais sito na Av. Da Cooperación, Bloque 1 – Baixo de San Valentín.
Ver máis
16-07-2020 -
16-07-2020 -
Benestar e igualdade

A Mocidade Activa de Fene, Mugardos e Neda ponse en marcha

Até o vindeiro 15 de agosto, vinte e dous mozos e mozas da bisbarra con idades comprendidas entre os 11 e os 16 anos participan no programa Mocidade Activa, promovido polo Concello de Fene e pola agrupación de Concellos de Mugardos e Neda. A iniciativa encádrase nun proxecto  de prevención de condutas aditivas subvencionado pola Consellería  de Sanidade e inclúe actividades como  fútbol burbulla, combate láser, obradoiros de impresión 3D, talleres de drons, de como ser Youtuber, de habilidades Maker, de habilidades persoais ou radio.
Ver máis
15-07-2020 -
15-07-2020 -
Cultura

Comeza o campamento “Un verán diferente” con especial atención ás medidas de hixiene e prevención fronte á Covid 19

Corenta e unha nenas e nenos participan dende hoxe no campamento de conciliación da vida laboral e familiar “Un verán diferente” que organiza a Concellería de Cultura de Fene. O programa desenvolverase no CEIP Centieiras de Perlío até finais do mes de xullo e centrará o seu proxecto nas actividades ao aire libre, tal e como se recolle nas recomendacións e medidas para o desenvolvemento das actividades de educación non formal, ocio educativo e tempo libre adaptadas á situación de COVID-19, publicadas pola Xunta de Galicia.
Ver máis
1 2 ...113 114 115116 117 ...322 323 >>