Novas

04-02-2022 -
04-02-2022 -
Fene ao día

San Valentín reúne este domingo o melloriño da artesanía local e comarcal

O paseo marítimo de San Valentín acollerá durante toda a xornada deste domingo 6 de febreiro a Feira de Artesanía organizada pola Concellaría de Promoción Económica, na que se darán cita 24 postos de dentro e fóra de Fene. A iniciativa busca poñer en valor a creación de proximidade ofrecéndolles ás artesás e artesáns participantes un espazo compartido -baixo carpa- no que expor e vender as súas manufacturas. 
Ver máis
03-02-2022 -
03-02-2022 -
Museo do Humor Xaquín Marín

As acuarelas de Antonio Rivas Pol amósanse en Fene neste mes de febreiro

Este venres, 4 de febreiro, inaugúrase na Casa da Cultura unha exposición de acuarelas de Antonio Rivas Pol. O acto, previsto para as 19.30 horas contará coa presenza, amais do artista, do alcalde de Fene, Juventino Trigo, e do concelleiro de Cultura, Justo Ardá. Tamén intervirá, en calidade de presentador do evento, o licenciado en Historia da Arte e autor dos libros A paisaxe da nación e Castelao. Plástica e pensamento.1903-1916, Suso Piñeiro. A mostra de Antonio Rivas Pol poderá visitarse en Fene até o vindeiro 28 de febreiro, de luns a venres, de 10.00 a 13.00 horas e de 16.00 a 21.00 horas, e os sábados, de 10.00 a 13.00 horas. Os domingos e festivos a sala de exposicións permanecerá pechada.
Ver máis
01-02-2022 -
01-02-2022 -
Museo do Humor Xaquín Marín

Moxom doa ao Museo do Humor unha das esculturas da exposición De boas madeiras

O alcalde de Fene, Juventino Trigo, e o escultor Xosé Manuel Rodríguez “Moxom” asinaron este luns o convenio de doazón polo que o artista ourensán doa ao Museo do Humor de Fene unha das pezas que formaron parte da exposición “De boas madeiras”, que se puido ver na Casa da Cultura ao longo do mes de xaneiro. Trátase da peza titulada “Fifi”, realizada en madeira de piñeiro e pintada con pinturas plásticas e acrílicas. As suas medidas son: 73 x 53 x 193 cm. Segundo se recolle no documento asinado por ámbalas dúas partes, a obra “pasará a formar parte dos fondos do Museo do Humor, podendo exhibirse nas súas dependencias, en mostras itinerantes ou publicacións propias”. Na sinatura do convenio de doazón, amais do alcalde e do artista, estivo tamén presente o concelleiro de Cultura de Fene, Justo Ardá.
Ver máis
27-01-2022 -
27-01-2022 -
Deporte

Fene converterase o sábado e o domingo na capital mundial do baile deportivo

O pavillón municipal da Xunqueira vivirá este sábado e domingo dúas xornadas moi intensas. Alí daranse cita cerca de 500 bailarinas e bailaríns  procedentes de 26 países no que será un dos eventos de baile deportivo estándar e latino de maior relevancia de cantos se teñen celebrado no Estado. E non é para menos, xa que a Dance Sport Cup Fene 2022 reunirá en San Valentín "ao mellor do mellor" destas disciplinas nun encontro con probas desde a categoría Junior até a Senior 4 (+de 60 anos). Ademais, no marco desta copa tamén se desenvolverán as series clasificatorias europeas de baile deportivo latino para obter o pase  aos Xogos Mundiais que terán lugar nos Estados Unidos no mes de xullo. As entradas poden adquirirse a través desta ligazón e a competición poderá seguirse por internet a través de LaLiga4 Sports e nas canles da Federación Española e da Federación Mundial de baile deportivo.
Ver máis
24-01-2022 -
24-01-2022 -
Fene ao día

Fene abre un novo prazo de licitación da xestión do Punto Limpo do Vilar do Colo

A Plataforma de Contratación co Sector Público recolle desde hai uns días a reapertura do prazo de licitación do contrato de explotación e mantemento do Punto Limpo do Vilar do Colo, despois de que a primeira convocatoria quedase deserta. As empresas interesadas teñen até o próximo 16 de febreiro para presentaren as súas propostas sobre un prezo que se incrementa en case 66.000 euros para os tres anos de vixencia máxima do contrato. O procedemento especifica que a participación na licitación se reserva a empresas que posúan a cualificación de Centros Especiais de Emprego e de iniciativa social ou a empresas de inserción reguladas.

O Concello licitou en outubro un contrato de xestión do punto limpo cun prezo base fixado en 207.175,08 euros. Finalmente a convocatoria quedou deserta e, por este motivo, a Comisión de seguimento formada polos tres municipios promotores -Fene, Cabanas e Ares- acordou publicala de novo recalculando o importe de saída, que se ascende agora a 272.972,58 euros, IVE incluído.
Ver máis
18-01-2022 -
18-01-2022 -
Fene ao día

Doa sangue

O venres 21 de xaneiro de 15.30 a  21.00 e sábado 22 de 10.00 a 15.00 horas a Unidade Móvil do Centro de Transfusións de Sangue de Galicia estará diante do Centro de Saúde de Fene.
As persoas que desexen doar sangue poden solicitar unha cita previa no teléfono gratuíto 900 100 828, sistema implantado para reforzar os protocolos de seguridade nas unidades móbiles e garantir unha afluencia axeitada e ordeada para cubrir as necesidades de sangue dos hospitais galegos.
Ver máis
17-01-2022 -
17-01-2022 -
Fene ao día

11 concellos da comarca de Ferrolterra, Eume e Miño exísenlle a Xunta que o transporte público e escolar recupere de inmediato as liñas e horarios que tiña ata hai un ano

Os rexedores de 11 municipios das comarcas de Ferrol e o Eume, ademais do de Miño, reuníronse o venres 14 de xaneiro en Pontedeume para abordar os problemas có transporte público de viaxeiros e escolar e, neste sentido, para esixirlle á Xunta de Galicia que estes servizos recuperen as liñas e frecuencias existentes até hai un ano, momento no que entrou en vigor o novo mapa de itinerarios e concesións do Transporte Metropolitano de Galicia. 

Na xuntanza, á que asistiu Juventino Trigo, criticouse a "actitude de desleixo" por parte da Dirección Xeral de Mobilidade e cualificouse a actual situación como "esperpéntica", habida conta de que unha auditoría efectuada recentemente amosou discrepancias entre o deseño das liñas enviado pola Xunta e o plan de traballo da UTE concesionaria na nosa zona. Nun comunicado emitido trala reunión, os once rexedores subscriben a denuncia de que o transporte público por estrada sofre "moitas deficiencias", ademais de atoparse nunha "situación lamentable que empeora cada mes".
Ver máis
11-01-2022 -
11-01-2022 -
Fene ao día

O Concello de Fene reúnese con Suelo Empresarial del Atlántico para abrir novas vías de colaboración entre ambas entidades

O alcalde, Juventino Trigo, o concelleiro Manuel Polo e a concelleira  e Mar Piñeiro reuníronse este luns coa xerente da sociedade pública Suelo Empresarial del Atlántico S.L., Beatriz Sestayo, para tratar varias cuestións relacionadas co chan de titulariedade estatal no municipio. Na xuntanza solicitada polo Executivo local abordáronse distintas liñas de colaboración referidas tanto ao polígono do Vilar do Colo -de cuxa xestión se encarga SEA- como a outras parcelas propiedade da Sociedade Estatal de Promoción e Equipamento do Solo (SEPES) que se encontran na zona urbana, nomeadamente na Avenida do Tarrío.
Ver máis
10-01-2022 -
10-01-2022 -
Fene ao día

A física especializada en atmosfera Susana Bayo protagoniza a primeira sesión de ContandoCiencia

Sobre “A pelexa da ciencia contra o cambio climático” xirará este mércores, 12 de xaneiro, a primeira charla do ciclo de divulgación científica ContandoCiencia. A actividade, organizada pola Biblioteca do IES de Fene coa colaboración da Concellería de Ensino de Fene, contará nesta conferencia inaugural coa física especializada en atmosfera e medio ambiente Susana Bayo. A cita será o mércores a partir das 19.30 horas na Casa da Cultura de Fene, con entrada libre e de balde até completar o aforo.
Ver máis
03-01-2022 -
03-01-2022 -
Cultura

As esculturas de Moxom amósanse desde este venres na Casa da Cultura

“De boas madeiras” é o título da mostra que abre o calendario de exposicións da Casa da Cultura de Fene neste 2022. O escultor ourensán Xosé Manuel Rodríguez “Moxom” está detrás desta colección na que se poderán ver até o vindeiro 31 de xaneiro un total de 16 obras de diversos tamaños. Primordialmente son “figuras femininas, con rostros e posturas naturais, con moita cor, lembrando os meus inicios no mundo do cómic”, afirma Moxom. Aínda que este venres 7 de xaneiro o horario de visitas será unicamente de mañá, de 10.00 a 14.15 horas (e o sábado 8 e o domingo 9 a instalación permanecerá pechada), a partir do vindeiro luns, 10 de xaneiro, a mostra poderá visitarse de luns a venres, de 10.00 a 13.00 horas e de 16.00 a 21.00 horas, e os sábados, de 10.00 a 13.00 horas. Os domingos e festivos a Casa da Cultura de Fene está pechada.
Ver máis
1 2 ...73 74 7576 77 ...319 320 >>